Aldundiak berretsi du egoiliarren txertaketa bermatu duela
Aiton Etxeko egoiliarren senideekin bildu da foru erakundea. Adinekoen segurtasunak eta osasunak "lehentasun osoa" duela esan dute.
Maite Peña diputatua, erdian, Aiton Etxeko egoiliarren senideekin izan zuen bileran. Gipuzkoako Foru Aldundia Aiton Etxe eguneko zentroko senideekin elkartu da. Altzibarko zentroko zuzendaritzak pasa den astean iragarri zuen ez zuela baimenduko txertoa jartzea instalazioetan.
Maite Peña Gizarte Politikako diputatua eta Jose Antonio de la Rica Jaurlaritzako Koordinazio Soziosanitarioko zuzendaria telematikoki bildu dira senideekin. Ziurtatu dietenez, egoiliarren osasuna eta segurtasuna bermatuko dute erakundeek. “Aldundiak Osakidetzaren txertaketa protokoloak gizarte baliabide guztietan aplikatuko ditu, salbuespenik gabe”, jakinarazi zien Peñak.
Atzoko bileran, erakundeetako ordezkariek gogorarazi zieten txertaketa prozesua momentu honetan adinekoen egoitzan ari direla egiten. Ondoren hasiko dira beste eremu batzuetan; tartean, eguneko zentroetan.
Hori bai, Osakidetzak lehendabizi horrelako zentroetan jarraitu beharreko protokoloa zehaztuko du, eta ondoren hasiko da txertaketa kanpaina Gipuzkoako eguneko zentro guztietan.
Ardura kolektiborako deia
Peña diputatuak ardura kolektiborako deia egin zuen. Bere esanetan, COVID.19a denenartean garaitu beharreko gaitza da. Zehaztu zuenez, aldundia “lehen minututik” ari da elkarlanean Osakidetzarekin zein Eusko Jaurlaritzako Osasun Sailarekin.
“Kontutan izan behar duguna da zentro hauetan daudela edo artatzen direla COVID-19 gaitzaren aurrean zaurgarrienak diren pertsonak, eta horregatik ari gara guztiok ahalegin berezia egiten eremu honetan”, nabarmendu zuen Ongizate diputatuak. Bide batez, arlo sozio-sanitarioko langileei eskerrak eman zizkien Peñak.
