Emakume bat larri zauritu dute labain batekin eraso eginda
56 urteko gizon bat atxilotu du Ertzaintzak erasoa egotzita, eta hilketa saiakera leporatu dio.
Ertzaintzak atxilotu egin du bide segurtasunaren aurkako delitua leporatuta. Emakume bat larri zauritu dute Errenterian, lepoan sastatu ondoren. 56 urteko gizon bat atxilotu du Ertzaintzak erasoa egotzita, eta hilketa saiakera leporatu dio. Segurtasun Sailak zabaldu duen informazioaren arabera, gizonak ebakia egin dio emakumeari lepoan labain batekin, dirua eskatu ondoren. Errenteriako osasun zentro batean artatu dute lehenik emakumea, baina azkenean, Donostia Ospitalera eraman dute zaurien larritasunarengatik; bertan ebakuntza egin behar izan diote, eta une honetan emakumea egonkor badago ere, Zaintza Intentsiboko Unitatean aurkitzen da.
Iztietako anbulatoriotik deitu zioten Ertzaintzari esateko lepoan zaurituta zegoen emakume bat artatzen ari zirela. Atzo arratsean izan zen erasoa, 21:30ean. Emakumeak berak azaldu zien bertaratu ziren ertzainei, erasoa, Nafarroa etorbideko arkupe batzuetan izan zela eta egilea gurpildun aulkian zegoen gizon bat izan zela. Ustezko egilearen deskripzioarekin bat zetorren gizona aurkitu zuten agenteek aipatu arkupeetan. Jantziak odolarekin zikinduta zituen gainera, betiere Segurtasun Sailak emandako informazioaren arabera. Identifikatuta, gertatutakoa argitzeko ertzain etxera eraman zuten.
Gertakarien lekuan jasotako informazioaren arabera, emakumea beste bi pertsonarekin banku batean eserita zegoen. Bat-batean erasoaren ustezko egilea gerturatu eta dirua eskatu ziola azaldu du Segurtasun Sailak, emakumeak ezezkoa erantzunda, labaina atera, lepoan jarri eta ebakia eragin zion.
Gizona atxilotu egin zuten homizidio saiakera egotzita. Labaina ere aurkitu dute erasoa izan zen lekuan, ustezko erasotzaileak erabilitakoa da.
Segurtasun Sailak erasotzaileak eta emakumeak elkar ezagutzen zutela zehaztu du, baina ez zutela haien artean lotura sentimentalik gaineratu du.
Erasotzailea, gaur bertan eraman dute epailearen aurrera.
