Hasierako helburuak beteta, bigarren fase batean sartuko da Labore
Labore Oarso orain dela lau urte jarri zen martxan. Larunbatean batzar nagusia egin zuten, eta pisuzko erabakiak hartu zituzten, etorkizunari begira.
1.600 erreferentzia inguru dituzte Laboren. Labore Oarsok 2017an hasi zuen bere ibilbidea. Pasa den larunbatean, bazkideen batzar orokorra egin zuten, eta bertan ziurtatu zuten “hasierako ametsak egi bihurtu” direla.
Hasierako helburu horiei errepasoa eman zieten: mila bazkidetik gora ditu kontsumo kooperatibak; kanpo ekintzen egitarau propioa landu du; 1.600 erreferentziatik erdia bertako produktuak izatea; eta sei langileko lan talde egonkorra sortu dute.
Horiek lortuta, bigarren fase batean sartuko dira. “Berriz ere amets egiteko garaia da; egi bihurtuko ditugun ametsak. Ametsak, dena dela, badituzte oinarri batzuk, Labore ez baitzen sortu denda soil bat izateko”, adierazi zuten.
Zaintzarako helburuarekin sortu zen Labore, hainbat esparrutan:
- Bertako ekonomia zaindu, lehen sektorea indartuz eta kontsumo zirkularra indartuz.
- Oarsoarrak zaindu, elikadura osasuntsua eskubidea baita.
- Irabazi asmorik gabeko elkarte izaeraren bitartez, bazkideak zaintzea.
- Ingurumena zaintzea, bertakoa eta garaian garaikoa kontsumituz.
Horrez gain, hizkuntza paisaia eta barne eta kanpo komunikazioa euskara hutsez egiten dutela gogorarazi zuten.
Azpi-batzorde berriak
Bigarren faseari begira, azpi-batzorde berriak sortzea erabaki du Labore Oarsok. Zazpi izango dira guztira:
- Etxekoak: Labore dendaren mantenuaz arduratuko da, eta lokala hobetzeko inbertsioez arduratuko da.
- Produktu taldea: Dendan eskaintzen diren produktuak aukeratzeaz eta hobekuntzaz arduratuko den lan taldea. Produktuen ebaluazioa eta haien gaineko pedagogia egiten du. Kontsumitzaileen eskaerak bideratzen ditu, eta ahalegintzen da inguruko ekoizle txikiekin harremanetan jartzen.
- Ekoizleak: Eskualdeko ekoizleen artean sortuko den taldea da. Ekoizleen beharrak asetzen saiatuko da, eta behar izanez gero, laguntzeko auzolan saioak egiten.
- Konplizeak: Komunitateko kide guztiak zaintzeaz arduratuko da, baita irabazi asmorik gabeko elkarteekin harreman zuzenak lantzeaz ere.
- Laborategia: Datozen urteetan egitasmoa sendotzeko pausoak aztertuko dituen taldea da, tartean plan estrategikoa sortzekoa.
- Komunikazio taldea: Webgunea berritzen ari dira, eta kanpainak sortu eta diseinatuko ditu, baita urteko egutegia osatu ere.
- Zuzendaritza taldea: Lan talde guztietako kideek, lehendakariak, idazkariak diruzainak eta langileen ordezkariak osatzen dute. Eguneroko jarduerari lotutako erabakiak hartuko dituzte, estrategikoak batzar nagusiak hartzen baititu.
Horiek dira oraingoz sortutako azpi-batzordeak, eta beste batzuk sortzea ez zuten baztertu. Parekidetasuna mantentzen saiatuko direla iragarri zuten. Horrez gain, Labore Oarsoko bazkideek egiten dituzten auzolanak nabarmendu zituzten.
Inbertsioak
Pandemiagatik ezin izan zuten batzar nagusirik egin, eta larunbatekoan iazko zein 2019ko diru kontuak aurkeztu zituzten. “Azpimarratu behar da egoera egonkorra eta gastu-sarrera orekatuak direla. Bazkide kuota 50 eurotan mantendu da”, jakinarazi zuten.
Aurtengo inbertsioak onartu zituzten batzar nagusian. Horrela, lokala egokitzeko isolatze-lanak egingo dituzte, eta aparkalekua txukunduko dute.
Horrez gain, lehendakari eta idazkari berriak aukeratu zituzten, datozen hiru urterako. Joana Mendiburu izango da presidentea, eta beste kargua Maitena Urretabizkaiak izango du. Salvador Zarrazkin izango da diruzaina, orain arte bezala.
