Aintzane Pujana gogoratu eta indarkeria matxista salatzeko elkartuko dira bihar
Oiartzungo Feministen Asanbladak elkarretaratzea deitu du bihar eguerdirako. Emakumeak "aske eta bizirik" nahi dituztela aldarrikatuko dute.
Oiartzungo Feministen Asanbladak elkarretaratzea deitu du bihar eguerdirako. Beste hilketa matxista bat salatuko dute, Aintzane Pujanarena zehazki. Plazan batuko dira, 13:00etan, Emakumeok aske eta bizirik lelopean.
Pujanaren gorpua hilaren 4an agertu zen Urola ibaiaren ertzean. 24 eta 23 urteko bi pertsona atxilotu zituzten urtarrilaren 12an, hilketa egotzita. Ikerketako iturrien arabera, urtarrilaren 2an labankadaz hil zuten, eta frogak desagerrarazteko Gipuzkoako hainbat txokotan ibili zen bikotea, baita bizi ziren landetxeko apartamenduko arrastoak garbitzen.
Hilketaz gain, epaileak beste bi delitu leporatzen dio behin-behinean kartzelan dagoen bikoteari: Pujana gogoz kontra atxiki izana, eta emakumea sexualki esplotatu izana. El Diario Vasco egunkariak gaur adierazi duenez, gutxienez beste emakume bat esplotatu zuten.
Udalak bat egin du
Oiartzungo Udalak jakinarazi duenez, bat egingo du mugimendu feministaren deialdiarekin. Oiartzuarrak gonbidatu ditu mobilizazioetan parte har dezaten. “Emakumeenganako indarkeriaren kontra, bere konpromisoa berresten du udalak”, gaineratu dute.
