Pasaiako merkataritza, ostalaritza eta zerbitzuak suspertzeko bilera
Datorren asteazkenean -hilak 27- bilera egingo dute online herriko ostalari, merkatari eta zerbitzuetako langileei eskua luzatzeko asmoz.
Bilera online izango da, Zoom plataformaren bitartez. 
Joan den urtean Pasaiako Udalak Merkataritza, Ostalaritza eta Zerbitzuak Suspertzeko Plan Bereziaren baitan eginiko azterketaren ondorioak eta lan ildoak aurkeztuko dizkiete Pasaiako merkataritza, ostalaritza eta zerbitzuen sektoreei; horrez gain, sektore horiek biziberritzeko plana ere aurkeztuko dute datorren asteazkenean -hilak 27-, 14:00etan Zoom plataformaren bidez egingo den bileran.
Koronabirusak sortutako krisiak garapen lanean neurri handi batean eragin arren, planaren diseinua gauzatu ahal izan da. Pasaiako merkataritza, ostalaritza eta zerbitzuetako langileekin saioak egin dira eta hirugarren honetan, egungo egoeratik abiatuta, sektore hauen diagnostikoaren ondorio nagusiak, lan ildo estrategikoak eta ildo horietako bakoitzeko jarduera ekintzak aurkeztuko dira.
Antolatzaileek gogora ekarri dute azterketa lagungarria bada ere, sektoreen konpromisoa eta parte hartzea ezinbestekoa dela: “Indarberritzeko lanak indarrak batzea eta batera lan egitea eskatzen du; bestalde, planak zer urrats eman eta norantz egin jakiteko balioko digu”.
Bileran parte hartzeko izena eman daiteke esteka honen bitartez.
