Auzo elkarteak antxotarren kezkak eramango ditu udalera
Antxoko Auzo Elkarteak galdetegi bat prestatu du bizilagunen proposamen, kezka eta iradokizunak alkatearekin egingo duten hurrengo bileran aurkezteko.
Antxoko Auzo Elkartearen aurkezpena. Artxibo irudia. 
Pasai Antxoko Auzo Elkarteak galdetegi bat prestatu du datorren asteazkenean -otsailak 3- udaletxean Izaskun Gomez alkatearekin izango duten bilerarako gaiak herriko ordezkariari aurkezteko. Inkesta horren bitartez antxotarren proposamen, kezka, eta iradokizunak jaso nahi dituzte.
Auzo taldea sortu zenetik aldian aldiro egiten dituzte bilerak Pasaiako Udalarekin, eta hurrengoa otsailekoa izango da. Antolatzaileek antxotarrak animatu dituzte galderei erantzun diezaieten, minutu pare bat besterik ez direlako behar hura osatzeko, eta benetan lagungarri izan dakioke elkarteari, antxotarren benetako premiak egoki helarazteko udal gobernuari.
Galdetegia honako esteka honen bitartez bete daiteke. Era berean, elkarteak gogora ekarri du edozein gisako zalantza nahiz ezinegonak helarazi ahal izateko e-posta ere badutela.
