Pobrezia energetikoaren ikerketa egin delako pozik azaldu da PSE-EE
Gaiari, seriotasunez erantzuteko ezinbesteko tresna izango da diagnostikoa Isaac Palencia PSE-EEren bozeramailearen esanetan.
Isaac Palencia, PSE-EEren bozeramailea. Argazkia: PSE-EE Errenterian pobrezia energetikoaren egoera, eragina eta ondorioak aztertu dituen ikerketaren emaitzen berri eman zuen pasa den astean Errenteriako Udalak. SIIS Gizarte Zerbitzuen eta Politika Sozialen Dokumentazio eta Ikerketa Zentroa dago ikerketaren atzean. Hura aurkeztu eta astebetera, pozik azaldu da alderdi sozialista azterketa egin izanagatik, eta Errenteriak baduelako pobrezia energetikoaren gaineko diagnostikoa.
“Hainbat urte daramagu iniziatiba eta mozioak aurkezten pobrezia energetikoaren gaineko ikerketa egitea eskatzeko, eta mozio bidez, aurrekontuen gaineko hitzarmena egin genuenean lortu genuen iaz”, esan du Isaac Palencia PSE-EEren bozeramaileak. Gaiari, seriotasunez erantzuteko ezinbesteko tresna izango da diagnostikoa bere esanetan.
2016an mozioa aurkeztu zutela esan du Palenciak pobrezia energetikoaren gainekoa, “aho batez onartu zuen plenoak, baina gero, ez zituen akordioak bete gobernu taldeak, eta hala salatu genuen 2017an. Bost urte geroago, azkenik iritsi da, eta pozik gaude horregatik, baina salatu nahi dugu urteetan atzeratu dela eskaera hori”. Zalantzarik ez du erabilgarria izango dela diagnostiko hori, “familia askori eragiten dien gaitz horri aurre egiteko udal plangintza osatzeko”.
