52 ostalaritza eta jatetxe establezimendu lagunduko ditu diruz udalak
Pasaiako Udalak 93.000 euro inbertituko ditu 1.500 eta 2.000 euro arteko diru laguntza zuzenetan. Guztira 52 eskaera onartu dituzte.
Denera 52 diru laguntza emango dizkie Pasaiako Udalak udalerriko ostalaritza eta jatetxe establezimenduei. 
Pasaiako Udalak 1.500etik 2.000 eurora arteko diru laguntza zuzenak emango dizkie udalerriko 52 ostalaritza eta jatetxe establezimenduri. Guztira 93.000 euro inguru zuzenduko ditu udalak onartutako diru laguntzetan.
Eskaerak aurkezteko epea joan den urteko abenduaren 30ean amaitu zen, eta guztira 57 eskakizun erregistratu ziren denbora tarte horretan -horietatik batek ez ditu betetzen mikroenpresa izateko baldintzak, hamar langile baino gehiago dituelako, eta beste lauk zuzenketak egin beharko dituzte laguntza jasotzeko-.
Establezimendu bakoitzak gehienez ere 2.000 euroko diru laguntza jasoko du, honako irizpide hauen baitan:
- Fakturazioa murrizteagatik:
- 1.500 euroko laguntza zuzena establezimendu bakoitzeko (oinarria 52entzat).
- 80 euroko osagarria 70 metro koadrorainoko establezimenduentzako (22 guztira, %42a).
- 100 euroko osagarria 70 metro koadrotik gorako establezimenduentzako (27 guztira, %52a).
- 150 euroko osagarria, establezimenduak hiru langile edo gehiago baldin baditu (21 guztira, %40a).
- Alokairu eta mailegu gastuengatik:
- Gehienez ere, 250 euroko osagarria (32 guztira, %62a).
