Haur erbesteratuei buruzko dokumental propioa proiektatuko du Kattin Txikik
'Gerrako haur' izandako bost oiartzuarren testigantzak jaso ditu Kattin Txikik, eta hilaren 13ko ekitaldian bertan omenduko dituzte.
'Habana' itsasontziko irudia. Kattin Txikik haur erbesteratuei buruzko dokumentala aurkeztuko du hilaren 13an, larunbata. 35 minutuko dokumentala egiteko, 1936ko Gerran herritik alde egin behar izan zuten bost oiartzuarren testigantzak jaso dituzte.
Maria Gaztelumendi Sagarzazu, Nikolas Aristizabal Alzugarai, Maria Luisa Lahoya Lapesa, Manoli Mujika Ezponda eta Maritxu Mujika Ezponda dira beren lekukotzaren ekarpena egin dutenak. Ingalaterran edo Frantzian egon ziren bost oiartzuarrak omenduko dituzte datorren asteko ekitaldian (12:00etan hasiko da).
Bertara joateko gonbidapena lortu beharko da. Horretarako, 673 02 40 44 edo 656 78 15 45 telefono zenbakietara deitu beharko da.
37.930 haur
Kattin Txikik 1936ko testuingurua gogorarazi du. Gerrak familietan eragin handia izan duela nabarmendu dute: “Gizonezkoak zirenak, aitak eta anai helduenak, oro har, borroka egitera joan ziren eta emakumeak, euren haurrak eta adineko pertsonak aurrera ateratzeko eta bizirauteko, sekulakoak asmatu beharrean aurkitu ziren”.
Frontetik hurbil edo urrun bizitzeak asko baldintzatu zuen. Oiartzunen kasuan, miliziano errepublikazaleek atzera egin zutenean, hainbat familiak alde egin behar izan zuen herritik, eskualde seguruagoetara.
Gerrak aurrera egin ahala, Gipuzkoako 100.000 bat lagunek Bizkaira ihes egin zuten. “Itsasoa zen irtenbide bakarra, itsasotik bakarrik joan zitezkeen Frantziara, Ingalaterrara, Danimarkara, Belgikara, Errusiara eta Mexikora ere”, adierazi du memoria historia lantzen duen elkarteak.
Guztira Euskal Herriko 37.930 haur erbesteratu ziren, 30 itsasontzik egindako 61 bidaiatan.
Elkartasuna mundu osoan
Erbesteratze horiek aurrera eraman ahal izateko, erakunde politiko eta sindikalek zein beste herrialdeetako gobernu eta erakunde solidarioek. Gernikako bonbardaketa izan zen, oro har, horren akuilu.
“Bizimodu berrira egokituak zeudenean”, jarraitu dute Kattin Txikikoek, “hizkuntza ikasia, familia, lagunak eginak, etxera itzuliarazi zituzten haur hauek. Maitasuna eman zieten familiak berriz ere utzi beharrean aurkitu ziren, berriz ere urradurak sortu ziren eta gainera… zer topatuko ote zuten etxerako bueltan?”.
Francoren erregimenarekin topo egin zuten, eta “gorrien seme-alabak” zirelako baztertu zituzten
