Ihoteetan karta jolasean aritzera gonbidatu dute
Aurten Oiartzunen ez da inauteri festarik ospatuko. Abaraxka ludotekak ihoteetan oinarritutako karta jolasa eskuragarri du.
Kutxa batean jaso dute karta jolasa.
Beste hainbat festa bezala, aurtengo ihoteak bertan behera geratu dira. Abaraxka ludotekak gonbidapena egin die oiartzuarrei, ihoteak mahai baten inguruan ospa dezaten.
56 kartako jolasa kaleratu dute. Hainbat karta jolasetan ibiltzeko aukera emateaz gain, ihoteen historia jaso dute liburuxka batean, festaren berezitasunak azaldu eta nabarmenduz. Hori guztia kutxa batean bildu dute, txukun.
Abaraxkan sortu zen kultura, ondarea eta jolasa sortzeko ideia. Dixidu estudioko Eneko Salaberriaren ardura izan da diseinua, eta Iosu Mitxelenak egin ditu sorgin, basandere eta intxixu, auzo eta abarren ilustrazioak.
Karta jolasa 15 euroan eskura daiteke, honako tokietan:
- Abaraxka ludoteka.
- Dixidu diseinu grafikoa.
- Elizalde herri eskola.
- Haurtzaro ikastola.
- Ehuntze espazioa.
- Intxixu AEK euskaltegia.
- Labore Oarso.
- Oiartzun Irratia.
- Hondarribiko Txispum zentro ludikoa.
- Astigarragako Amalei estetika zentroa.
