Gezalako kultur ekitaldietan, betekada
Otsailerako programatu diren kultur ekitaldietatik lautan ez dago sarrerak erosteko aukera, tartean, igandeko 'Gorria' ikuskizunarenak.
Hilaren 28an taularatuko dute 'Losers' antzezlana Gezalan. Ez da sarrerarik gelditzen. Otsail mamitsua Gezala Auditoriumeko ekitaldiei dagokienez. Hil honetan egingo diren kultur emanaldietatik lauk jada ez dute sarrerarik salgai. Agortu egin dira. Horien erakargarritasuna, eta COVID-19aren ondoriozko aforo mugek eragin dute hori.
Adibidez, igande honetarako (19:30) iragarrita dagoen Gorria bertsolaritza eta flamenko ikuskizunerako sarrerarik ez da. Hilaren 12an, Lezoko Zinema Ttikiaren barruan (19:00), Sagarren denbora dokumentala ikusteko tiketik ez da aldi berean. Otsailaren 13an (19:00), beste betekada bat: Lander Garro oreretarrak zuzendutako 2 urte, 4 hilabete eta egun bat intsumisoaren mugimenduari buruzko ikus-entzunezkorako ez dago tokirik jada. Azkenik, hilaren 28rako (19:30) programatua dagoen Losers antzerkiak ere ez du ikusle gehiagorentzako lekurik, papera bukatu delako.
Gainerako kultur ekitaldientzat badaude sarrerak eskuragarri. Horien berri izateko sartu HITZAren agendan. Sarrerak Lezoko Udalaren webgunetik eros daitezke.
