Topoaren lurperatzea eskatzen duen mozioa aurkeztu du PSE-EEk
"Garrantzi bizikoa" da herriaren etorkizuneko garapenerako Palenciaren hitzetan proiektu hori, baita herritarren bizi kalitatea hobetzeko ere.
Isaac Palencia.PSE-EEko bozeramailea. “Topoa lurperatzeak Errenteriak duen trenbide orbaina ezabatuko du behin betiko”. Hala esan du Isaac Palenciak, PSE-EEko bozeramaileak gaur goizean egin duen agerraldian. Bertan jakinarazi du, bere alderdiak mozioa aurkeztu duela gaur bertan datorren udalbatzaren osoko bilkuran lantzeko, topoaren lurperatzearen alde egiteko eskatuz udalari.
“Garrantzi bizikoa” da herriaren etorkizuneko garapenerako Palenciaren hitzetan proiektu hori, baita herritarren bizi kalitatea hobetzeko ere, “proiektua aurrera ateratzeko instituzio arteko elkarlana ezinbestekoa da, udalak eta Eusko Jaurlaritzak elkarlanean aritu behar dute bi administrazio publiko horien artean akordio batera heldu eta 2011n jaurlaritzak berak onartu zuen proiektua aurrera ateratzeko”.
Iazko azaroaz geroztik Garraio kontseilari orde Pedro Marco eta Eusko Jaurlaritzako Garraio Zuzendari Loli de Juanekin bildu dela azaldu du Palenciak, eta bi bilera horietan trenbide sareko eremu horretan hobekuntzak eskatu ditu; “duela hamar urte jaurlaritzak berak onartu zuen Donostialdeko Metroaren Azterketa Informatiboa txostenean jasota daude dagoeneko hobekuntza horiek”.
Palencia Topoaren Erdialdeko geltoki kanpoan. Argazkia: PSE-EE
Topoa lurperatzearen onurak apatu ditu alderdi sozialistaren bozeramaileak, “mugikortasuna eta irisgarritasuna hobetuko dira, espazio berriak sortu, eta hegoaldeko saihesbidea amaitzea ahalbidetuko luke; azken horrekin hiri erdiguneko mugikortasuna hobetuko litzateke, auzoen arteko komunikazioa eta irisgarritasuna hobetuz, eta topoaren eta autoen zarata ezabatuta”.
Topoak Errenteria betidanik zatitu duela nabarmendu du Palenciak, bestalde, “dimentsio handiko barrera efektua eragin du eta ezabatu egin behar da”. Horrekin batera, garai baten topoen unitateak gordetzen zituzten tailerrak hutsik daudela gogorarazi du, “eremu hila dugu hor, erabiltzen ez dena Irungo Araso industria gunean daudelako orain kotxerak; espazio horiek herriarentzat berreskuratu behar dira”.
Proiektuari heltzeko “une egokia” dela esan du Palenciak, “izan ere, lizitaziora atera dute Altza-Galtzaraborda zatiaren lanak; hori zen hasieran jarri zuten baldintza gure herrian den trenbide zatia lurperatu ahal izateko”. Horrekin batera, Hiria Antolatzeko Plan Orokorra lantzen ari dela udala ekarri du gogora, “planifikazio horretan topoaren lurperatzea sartzeko orain da unea”.
