Ernai: "Justizia deitzen diote, mendekua denean"
Oreretako Ernaik deituta, elkarretaratzea egin dute, Galder Barbado eta Aitor Zelaiaren kontrako zigorra salatzeko. Elkartasuna eta elkar zaintzan jarraituko dutela esan dute.
Espainiako Auzitegi Nazionalak aste honetan jakinarazi du Aitor Zelaia eta Galder Barbado gazte arabarren kontrako epaia. Lau urteko zigorra ebatzi du epaitegiak, lehergaiak egiteko materiala egotzita.
“Injustizia berretsi” dela adierazi dute gaur, Ernaik deitutako elkarretaratzean. Duela bi aste egin zen epaiketa “antzerki makabro” bezala definitu dute, eta duela bi urte hasitako prozesua “amaigabetzat” jo. “Bidegabekeria onartezin honen aurrean, eskura ditugun bide guztiak erabiltzen jarraituko dugu”, esan dute.
Oraindik bukatu ez den auziaren bilakaerak Barbado eta Zelaiaren bizitza baldintzatuko duela salatu dute. “Ankerkeri batean murgilduta jarraituko dute, eta herri honen elkartasunaren indarra erakutsi nahi dugu”, gaineratu dute.
“Justizia deitzen diote, mendekua denean. Anakronikoa dirudien auzi honek agerian utzi du zein den espainiar justiziaren izaera”, erantsi dute. Polizien deklarazioa nahiko izan dela salatu dute: “Aspalditik zirriborratuta zeukaten erabaki bati sinadura ofiziala jarri diote”.
“Herri oso baten kontrako erasoa”
Esan dutenez, euskal gazteria osoa zigortu nahi izan dute epai horrekin, eta “muntai poliziala” bezala deskribatu dute. “Ez da gazte arabarren kontrako eraso huts bat, herri oso baten nahiak, desirak eta ametsak zapuztu nahi dituen eraso planifikatua baizik”.
Elkartasunean eta elkarrekiko babesean oinarritzen den bidean jarraituko dutela hitz eman dute. “Hori da herri honek hamarkadetan zehar erakutsitako baliorik handiena”.
