Antxotarren %25a ez dago pozik gobernu taldearen kudeaketarekin
Auzo Elkarteak egindako inkesta baten emaitzen arabera, bizilagunen %33aren gogobetetze maila "oso txikia" da. Segurtasunak kezkatzen ditu gehien.
Bide publikoaren argi ezak eta topoaren lurperatzeak ere kezkatzen ditu antxotarrak. 
Pasai Antxoko Auzo Elkarteak sare sozialen bidez partekatutako inkesta baten emaitzen arabera, erantzuna eman duten bizilagunen laurdena baino gehiago ez dago pozik udal gobernuaren egungo kudeaketarekin. Guztira 206 bizilagunek eman dute euren iritzia galdetegiaren bitartez.
‘Adierazi zenbateraino zauden pozik Pasai Antxori dagokionez gobernu taldearen egungo kudeaketarekin’ atalean, euskarazko galdeketa erantzun duen herenak baino gehiagok asebetetze ‘oso txikia’ hautatu dute, 1-10 eskalan zenbakirik baxuena, beraz. Bigarren portzentaia altuena 2 zifrak lortu du, eta hirugarrena 8ak. Hori horrela, 10etik 3,7ko batezbestekoa jaso du PSE-EE eta EAJren gestioak galdeketan.
Kezkarik handiena zein duten galdetuta, bizilagun gehienek herritarren segurtasuna hautatu dute nagusitzat. Ildo horretan, aparkalekuen arazoa, portua, arratoiak, eta bide publikoaren argiztatzeak ere kezkatzen dituela islatzen dute emaitzek, besteak beste.
