Neska gazteentzako txokoa, Eskola Feministaren berrikuntza nagusia
Udaberriari begira ikastaro berriak proposatu dituzte gaur Lopez de Etxezarretak eta Leti Bermejo, Berdintasun teknikariak.
Lopez de Etxezarreta eta Bermejo. Esfortzu handia egiten ari dira Emakumeen Etxearen ateak zabalik mantentzeko pandemiaren testuinguruan. Beste arlo batzuetan bezala, irudimena baliatu eta agertoki berrira egokitzen asmatu dute, Garazi Lopez de Etxezarreta Berdintasun zinegotziak nabarmendu duenez, “ezinbestekoa delako eskaintzen duen zerbitzua ematen jarraitzea, are gehiago indarkeria matxista jasaten ari diren emakumeei begira; bertan eskaintzen ditugun zerbitzuak mantentzen jarraitzea lehenetsi da eta positiboki baloratu, pandemiak eta konfinamenduak, ordu pila suposatu dituzte etxe barruan, baita indarkeria matxista kasuak agerian jartzea”.
Adierazpen horiek Emakumeen Etxean egin ditu gaur udaberriko Eskola Feministaren programazioa aurkezteko agerraldian. Datuak ere eman ditu Berdintasun zinegotziak; horien arabera, emakume gutxiagok hartu zuten parte iazko ekitaldian 2019an baino, “pandemiarekin kopuruak murriztu behar izan dira, eta hala ere izena eman duen emakumeen kopurua oso garrantzitsua da eta uste dugu ezinbestekoa dela jarduerak eskaintzen jarraitzea”. 2019. urtean 258 izen emate izan ziren urrian, eta iaz, berriz, 179, “jaitsiera badago, baina masa kritiko inportante bat mantendu da eta uste dugu oso garrantzitsua dela”.
Udaberriari begira ikastaro berriak proposatu dituzte gaur Lopez de Etxezarretak eta Leti Bermejo, Berdintasun teknikariak. Horien artetik berrikuntza nagusia, neska gazteentzako txokoa sortzea da, “tailerrak antolatzeko eta baliabideak ikuspegi feministatik eskaintzeko”. 16 urtetik gorako neska guztiei eskainitako ahalduntze gunea da, eta bertan tailerrak eta ikastaroak eskainiko dituzte. Nerabe eta gazteengana heltzea esparru guztietan erronka bat dela, baita ahalduntzearekin zerikusia duten politikentzat ere, esan du zinegotziak, eta garrantzitsutzat jo du haiei begirako berariazko espazioa sortu izana, are gehiago aintzat hartuta gazte horiek izan direla eskaera egin dutenak.
Haien eskaerari begira, bi ikastaro antolatu dituzte udaberrian garatzeko. Sexualitateari buruzko hausnarketa izango da horietako lehena. Tailerraren helburu nagusia sexualitateari buruz duten informazioa, jarrerak eta jokabideak aztertzea izango da. Martxoaren 13an izango da, larunbata, 10:00etatik 14:00etara, euskaraz.
Hilerokoa gureganatzen izango da egingo duten bigarren tailerra. Hilerokoa modu positiboan ulertzea, sentitzea eta bizitzea izango du helburu. Apirilaren 17an egingo dute, larunbata, 10:00etatik 14:00etara, euskaraz.
Labirintoan barrena
Udaberriko programazioaren barruan adin guztietako emakumeei begirako hiru tailer berri aurkeztu dituzte gaurko agerraldian. Labirintoan barrena tailerrean, metafora gisa hartu dute labirintoa, COVID-19ak eta konfinamenduan izandako esperientziak jasotzea du helburu, ulermen prozesuan laguntzea, bai eta autokudeaketa baliabideak, krisia igarotzeko gakoak eta doluan moldatzeko jarraibideak ematea ere. Apirilaren 15etik ekainaren 17ra egingo dute ostegunero 15:00etatik 17:00etara, gazteleraz.
Gure praktikak eta jakintzat dekolonizatzen ditut emakume migratuentzako tailerra da. Bidez Bide elkarteak antolatu du, eta helburua, emakume gisa jatorrizko herrialdeetan eta Gipuzkoan izandako esperientzei buruzko gogoeta egitea da, feminismo dekolonialen ikuspegitik. Ostegunetan egingo dute tailer hori ere, martxoaren 11n eta 25ean, apirilaren 15ean eta 29an, maiatzaren 6an eta 20an eta ekainaren 3an, 10ean, 17an eta 24an. Ordutegia: 16:00etatik 18:00etara.
Autodefentsa Feminista tailerra ere antolatu dute, ohikoa da, eta beharrezkoa Lopez de Ertxezarretak esan duenez. Erasoak identifikatzen ikastea, indarkeriaren jatorria eta eraikuntza aztertzea alderdi guztietan, baita haren ondorioak ere du helburu. Ez hori bakarrik, eguneroko bizitzako eraso egoerei erantzuteko eta horiek konpontzeko mekanismoak eta jarduerak bilatzea ere badu xede, “gure eskubideez, erantzukizunaz eta gure gaitasunez jabetzea ahalbidetuko duen espazio bat sortzea, emakumeak gizonen baldintza beretan aritzea eragozten duen indarkeria mota horrekin amaitzeko”. Martxoaren 20a, larunbatarekin egingo dute tailerra o09:30etik 13:30era eta 15:30etik 19:30era, gazteleraz.
Ikastaro guztiak doakoak dira eta izena emateko epea hilaren 15etik 25era izango da. Zu! Zure Udala Arreta zerbitzuan (arreta arratsaldez jasotzeko beharrezkoa izango da hiztordua eskatzea 943 44 96 00 telefono zenbakira deituta) edo online.
Eskola Feministaren gaineko informazioa nahi dutenek, berriz, Emakumeen Etxera jo dezakete (Txirrita parkea z/g) edo 943 44 96 30 telefono zenbakira deitu astelehen eta ostiraletan 09:00etatik 13:00etara eta astearte, asteazken eta ostegunetan, 16:00etatik 20:00etara.
Programaren esku orria hemen deskarga daiteke.
