[Galeria] 1936ko Gerran erbesteratutako haurrek merezitako aitortza jaso dute
Gerratik ihes egin zuten bost oiartzuar omendu dituzte gaur Kattin Txikik eta udalak. Bost protagonisten lekukotzak dokumental batean jaso dituzte.
Alkatea, Nikolas Aristizabal Alzugarairekin batera gaurko omenaldian. 1936ko Gerran erbesteratutako haur oiartzuarrak omendu dituzte gaur udaletxean. Gerratik ihes egin zuten bost oiartzuarri omenaldi instituzionala egin die udalak, Kattin Txiki elkartearekin batera. Maria Gaztelumendi Sagarzazu, Nikolas Aristizabal Alzugarai, Maria Luisa Lahoya Lapesa, Manoli Mujika Ezponda eta Maritxu Mujika Ezponda aitortzeaz gain, elkarteak ekoitzitako dokumentala ikusteko aukera ere izan dute bertaratutakoek.
Ikus-entzunezkoan Euskal Herritik erbesterako bidea hartu zuten 37.930 haurrek pairatutakoa gogoratu dute, eta bereziki bost protagonista oiartzuarren lekukotzak jaso dituzte, zuzeneko elkarrizketekin. Protagonista nagusiez gain, garai hura bizitu zuten pertsonaia ugariren testigantzak ere bildu dituzte.
Proiekzioaren ostean, omenaldia egin diete. Tamalez, ezin izan dira protagonista guztiak bertaratu (horietako bat hil da eta beste baten osasun egoerak okerrera egin du), soilik Nikolas izan da gaurko ekitaldian. Harekin batera, Maritxu Mujika eta Maria Luisa Lahoyaren senitartekoak izan dira. Lore sorta bana jaso dute alkatearen eskutik, elkarteak ekoitzitako dokumentalarekin batera.
Amaitzeko, Jexux Leonet alkateak hartu du hitza. «196ko altxamenduaren ondorioak latzak izan ziren oiartzuarrentzako. Atxiloketak, heriotzak, umiliazioak… Errepresio latza bizitu zuten. Herrian beldurra sartu zen hezurretaraino. Eta goraipatzekoa da nola erantzun zioten errepresio horri garai hura bizitu zutenek. Gaur errekonozimendua eta aitortza egin izan diegu garai hartan erbesteratu ziren haur guztiei, baina baita ere haur horien guraso eta familia guztiei ere», esan du alkateak.
Dokumentala euskarri fisikoan eskura daiteke, 10 euroren truke. Horretarako, Kattin Txiki elkartekoekin harremanetan jarri beharko dira interesdunak.
Omenaldi irekia
Gaurko ekitaldiaren amaieran aurreratu dutenez, martxoaren 13an bigarren omenaldi ireki bat egingo dute Kattin Txikik eta udalak, beraz, gaurkoa galdu dutenak adi egon daitezela.
