Lezo da eremu gorrian dagoen Oarsoaldeko udalerri bakarra
Asteburuko datuekin 500eko langatik jaitsi da Pasaia. Lezoko tasak azken egunotan nabarmen behera egin badu ere, 872koa da oraindik.
Eusko Jaurlaritzak argitaratutako txostenaren arabera, bakarra da, egun, gorriz markatuta jarraitzen duen Oarsoaldeko udalerria: Lezo. Azken hiru eguneko datuekin multzo horren barruan zegoen beste herria, Pasaia, zaku gorritik atera da 454ko tasarekin.
Ostiraletik igandera arte hamar PCR positibo zenbatu dituzte Oiartzunen, bi ostiralean eta launa larunbat eta igandean (415ko tasa du udalerriak).
Errenteria-Oreretan hemezortzi izan dira atzemandako kasuak, tasa 391ean dagoelarik, hamaika zenbatu baitzituzten ostiralean, hiru larunbatean eta lau igandean.
Pasaia langa gorritik behera ekarri duten zenbakiak honakoak dira: lau positibo ostiralean, bost larunbatean eta bakarra igandean. Tasa 454ean dago orain.
Lezoko asteburua izan da hoberena koronabirus kasuei dagokienez, ostiralean lau zenbatu baitzituzten eta bat ere ez larunbat eta igandean. Zifra horiek nabarmen jaitsarazi dute tasa, izan ere, 1.000tik gorakoa zen zenbakia joan den ostiralean, eta 872koa da orain.
