2020 jaiotako haurrei atsolorra maiatzaren 23an egingo diete
Lehenengo prestaketa bilera egin zuten pasa den astean, eta bigarrena datorrenean izango da. 72 haur jaio ziren Oiartzunen pasa den urtean.
Oiartzungo jaio berriei harrera komunitarioa egitea da helburua [Arg.: @oiartzunudala]. 2020an jaiotako oiartzuarrei egin beharreko atsolorra maiatzaren 23an izango da. Horrela baieztatu du Iosune Cousillas Kultura zinegotziak Oiartzun Irratian.
Aurtengoa zazpigarren edizioa izango da. Oraingoz 27 haurren gurasok eman dute izena, beren seme-alabei komunitate ongietorria emateko. Iaz estreinako aldiz erabili zuten tokia izango da aurtengoaren agertoki: Arizmendi-eneko lorategia. Eguraldi txarrarekin B plan bat baliatu beharko dute.
Pasa den urtean 72 haur jaio ziren Oiartzunen. Pasa den astean elkartu ziren gurasoak lehen aldiz, ekitaldia prestatzeko. Datorren astean —hilaren 25ean, osteguna—, izango da bigarren saioa.
