[Bideoa eta galeria] Memoriaren zauriak osatzeko
Victor Fernandez Otxoa lezoarra omendu dute gaur Lezon. Datorren larunbatean, hilaren 27an 40 urte beteko dira Batallon Vasco Españolek lanean ari zen Hernaniko Benta Berri tabernan bizkarretik tirokatu eta tetraplegiko utzi zutela zaurien ondorioz. Hamalau urte geroago hil zen, atentatuak eragindako sufrimendu eta ondorioengatik.
PLaka jarri diote Victor Fernandez Otxoa zenari ALtamira auzoan, gerra zikinaren biktima izan zela 40 urte bete direnean. Victor Fernandez Otxoa lezoarra omendu dute gaur Lezon. Datorren larunbatean, hilaren 27an 40 urte beteko dira Batallon Vasco Españolek lanean ari zen Hernaniko Benta Berri tabernan bizkarretik tirokatu eta tetraplegiko utzi zutela zaurien ondorioz. Hamalau urte geroago hil zen, atentatuak eragindako sufrimendu eta ondorioengatik.
Omenaldi goxoa izan du gaur Fernandezek. Baita Margarita Larunbek ere, Fernandezen alarguna zena. Senarra hil eta hiru urtera hil zen; eta Fernandezek atentatua izan eta ondorengo hamalau urteetan haren helduleku izan zen, “bere begi, bere beso”, hala nabarmendu du Joxe Luix Agirretxek Fernandez Otxoari eta Margarita Larunberi gaur eskaini dieten omenaldiaren hitzartzean. Gurutze Santuaren plazan egina zuten hitzordua, bertatik Altamira auzora joateko eta auzo elkartearen kanpoaldean omenaldi ekitaldia egiteko.
Txistulariek zabaldu dute manifestazioaren ibilbidea, eta ondoren Fernandez Otxoaren bilobek eraman dituzte lezoarraren eta Margarita Larunberen argazkiak. Duintasunaren memoria memoriaren duintasuna leloa zuen pankartan Fernandez Otxoaren senideak eta atzetik hamarnaka herritar. Altamirara helduta, auzo elkartearen kanpoaldean egin dute ekitaldia. Joxe Luix Agirretxek hartu du hitza. Gogora ekarri ditu Fernandez Otxoa, eta 1980ko hamarkada: “Katramilatsua izan zen, garai hartako biktimek, aitortzarik ez dute jaso. Garai hartan haurrak ginenok, sumatzen genuen zer edo zer arraroa, eta normalizatu egin genuen egunero izaten ziren hilketak, zaurituak, espetxeratuak, poliziaren razziak… egunero bazen zerbait”. Karlos Saldise ezagutu zuela umetan esan du Agirretxek, baina herriko kaskoan bizi zirenentzat Fernandez Otxoari egindako erasoa oharkabeagoa pasa zela esan du, “Hernanin izan zen, zauritu egin zuten, ez zen unean hil, Altamiran bizi zen. Aurpegia jarri nion, Rafa Bandres zenak ‘Lezo hamar’ aldizkarian egin zion elkarrizketari esker”.
Gizon apala, langile zintzoa, umoretsua, pilotazalea, eta bere gurasoek izan zutena baino bizitza lasaiagoa eman nahi zuela nabarmendu du Agirretxek, “haren gurasoek, Victor eta Irenek 1936ko Gerraren ondorioz izugarrizkoak pairatu behar izan zituzten. Frontean ibili zen, ihesi egin behar izan zuen Gurseko kontzentrazio esparruan izan zen, eta bitartean ama Nafarroara itzuli zuen, gurasoengana, seme-alabekin. Fernandez Otxoa familiak behin baino gehiagotan sufritu behar izan du Espainiako Estatu faxistaren erasana”.
Victor Fernandez Otxoaren gainean egin duten dokumentala, joan den ostiralean Gezalan estreinatu zutena, ikustera gomendatu die bildutakoei Agirretxek, “Victorren historia, eta zauritu zutenetik hil arteko sufrikarioa oso ondo azaldu dute bertan”.
Plaka Altamiran
Aurrerantzean, Fernandez Otxoaren memoria are biziagoa mantenduko duen plaka izango da gaurtik Altamira auzoan. Oskar Fernandez Larunbe semeak kendu dio aitaren plakari estalkia. Ondoren aurreskua dantzatu diete eta krabelin gorriak eskaini Fernandez Otxoa eta Larunberen argazkiei.
Egiari Zor fundazioko kide Mikel Pascualek hartu du hitza ondoren. Bera ere biktima da, aitortu gabea. Lau hamarkadaz inpunitatea jasan ostean bizikidetza demokratikoa eraikitzeko garaia heldu dela esan du, berriro halakorik gerta ez dadin, “biktima guztiak dagozkien eskubideen jabe” izan daitezen, diskriminaziorik gabe: “Horregatik da ezinbestekoa gaur egiten ari garen moduan, herri honetan gertatutako biolentzia eta giza eskubide urraketa oro memoriaren parte izatea; gertatu zena ezagutzea berriro gertatuko ez dela bermatzeko bitartekorik eraginkorrena baita. Bilaka dadila gaur jarriko dugun plaka memoria osoa eraikitzeko norabidean giltzarri”.
Iñaki Labakak, berak sortutako kanta batekin eman dio amaiera ekitaldiari.
