Irati Elorrietaren 'Neguko argiak', Irakurketa Taldean
2019ko Euskadi Saria jaso zuen eleberriari buruz arituko dira gaur arratsaldean. Datorren hilabeterako, Jamaica Kincaiden 'Nire amaren biografia'.
Irati Elorrieta, 'Neguko argiak' liburuarekin. Oiartzungo Irakurketa gaur arratsaldean elkartuko da. Bibliotekan jarri dute hitzordua, 20:00etan. Irati Elorrieta Agirreren Neguko argiak irakurriko dute. 2019ko Euskadi Saria (narratiban) jaso zuen Pamielak argitaratutako liburua.
Eleberria Berlingo negu batean gertatzen da. Añes bizkaitarra eta Marta nafarra dira protagonista, gizonekin harreman zailak izan dituzten bi emakume.
Martxorako irakurgaia zein izango den badakite. Jamaica Kincaiden Nire amaren biografia irakurriko dute. Antigua uhartean jaiotako idazleak Xuela Claude Richardson fikziozko pertsonaiaren biografia idazten du, bere bizitzaren 70 urteei errepasoa emanez.
Karibeko Dominika uhartean kokatuta dago istorioa. Protagonistak ama galtzen du txikia denean, eta haurtzarotik heldutasunera egiten duen bidaia deskribatzen du Kincaidek. Ez du argumentu tradizionalik, baina pertsonaiak modu sakonean landu zituen idazleak, ez ohiko deskripzioak eginez.
Martxoaren 23an geratuko dira liburuari buruz hitz egiteko.
