Izaskun Gomez: "Antxoko bulebarrak ez du argia ikusiko datozen 15 edo 20 urtetan"
Alkateak adierazi du Tren Geltoki Berriaren Plataformaren proposamena ez dutela aintzat hartuko epe labur-ertainean. Ideia ez dute baztertu etorkizunerako.
Geltokia birgaitzeko Adifen proposamena eta herritarrena konbinagarriak direla adierazi du Trenaren Plataformak. 
Atzo udaletxean egindako ohiko udalbatzarrean Izaskun Gomez alkateak argi utzi zuen Antxoko barrutian bulebar berria sortzeko proposamena ez duela udalak aintzat hartuko epe labur-ertainean: “Momentu honetan ez da posible proiektu hori gauzatzea, eta ez da izango hurrengo 15 edo 20 urtetan behintzat”.
Gomezek argi utzi du herri proposamena ez dela baztertua izan ez udaletik, ez beste instituzio batetik, baina errepikatu du bozeramaileei “aldez edo moldez eta argumentuekin” adierazi zaiela Adifen proiektua ez duela udal gobernuak “hipotekatuko” eta, hortaz, bulebarra gauzatzekotan, etorkizun ez hurbilean izango dela hori.
Herri proposamenak iradokitzen duena da geltokia dagoen lursail zati bat lugorri uztea, bertan bulebar bat sortu ahal izateko, horrekin, barrutiari 13.000 metro koadro erabilgarri emanez. Plataformako kideek nabarmendu dute euren ideiak ez lukeela baztertuko Adifen jatorrizko plangintza, biak konbinagarriak baitira. Geroz eta gehiago dira aukera horri babesa adierazi dioten bizilagunak.
