Zazpi egun segidan COVID-19agatik kutsaturik gabe Lezon
Otsailaren 18tik atzora arte koronabirusagatik positibo bat bera ere ez da jaso herrian. 100.000 biztanleko tasa 115ean jarri da ondorioz.
COVID-19agatik kutsatutakoa desagertu egin dira Lezon. Otsailaren 18tik ez da positibo gehiagorik atzeman, atzora arte (hilak 24) herrian, hau da, zazpi egun jarraian zero kutsatu herrian. Horregatik, urte hasierako datuetara jaitsi da 100.000 biztanleko tasa, 115ean dago orain (urtarrilaren 7koaren berbera).
Edonola ere, urte hasiera gogorra izan da Lezokoa koronabirusaren eraginari erreparatzen bazaio. Urtarrilaren 28an ia 500ekoa zen tasa, eta otsailaren 4an 1.134raino igo zen; handik apurka hasieran, eta arrapaladan azken bi asteetan, ditxosozko tasa horrek etenik gabe behera egin du, atzoko 115a arte.
