Pasaiako emakumeen borrokak omenduko dituzte igandean
Pasaiako Mugimendu Feministak martxoaren 8aren baitan antolatutako lehen ekitaldia San Pedroko frontoian egingo dute. Barruti guztietatik bertaratuko dira.
Artxibo irudia. 2020ko martxoaren 8a, San Pedron. 
Pasaiako Mugimendu Feministak martxoaren 8aren baitan hainbat iniziatiba jarri ditu martxan datozen asteetarako. Horien artean lehena datorren igandean -hilak 28- egingo dute San Pedroko frontoian, Pasaiako emakumeon borrokak omenduz izenpean.
Ekitaldia 12:30ean hasiko da, baina aurretik, emakumez osaturiko bi zutabe aterako dira Trintxerpeko Gudarien Plazatik eta San Pedroko Torreatzetik. Trintxerpen, barruti hartako bizilagunez gain, Antxokoak ere bilduko dira. San Pedron, aldiz, sanjuandarrak ere hartuko dituzte. Horrela, lau barrutiak bitan laburtuko dira 12:00etan, gero elkargune bakarra osatzeko San Pedroko frontoian.
Ekitaldiaren ardatz udalerriko hainbat emakume izango dira. Horiek oholtzara igo eta nahi duenak hitza hartuko du, euren bizipenak eta bizilagunen borroken testigantzak komunean jartzeko. Euren buruari nahiz bidaide izandako horiei aitortza egiteko, memoriaren bidez.
Orobat, Pasaiako emakumeen ahotsa izango dira goiz batez; haien ordezkari feminista.
Ariketa horrek asmo du ospakizuna eta aldarrikapena uztartzea. Musika eta dantzaren bidez, emakumeen borroka feministaren ahotsa goratzea.
