Asteburuan, Jaixki etxean eta Allerru Hernanin
Areto futbol taldekoek Zabalgana Zarauna talde gasteiztarraren bisita jasoko dute Bekoerrotan. Allerruren gizonen taldeak lehen garaipena borrokatuko du.
Jaixkiren partida bihar arratsaldean da, Bekoerrotan. Pixkanaka berpizten ari dira kirol ligak. Asteburuan, areto futboleko Euskal Ligako Jaixkik etxean jokatuko du, eta gizonen futboleko Erregional Ohorezko Mailako Allerruk Hernanin. Gainera, behe mailetako kirola ere pixkanaka esnatzen hasi da. Munttarpe eskubaloi taldek neska kadeteek, adibidez, igandean jokatuko dute Orio Eskubaloiaren kantxan (11:15).
Jaixkiren partida bihar (larunbata) da, 17:00etan Bekoerrota kiroldegian. Zabalgana Zarauna talde gasteiztarraren bisita jasoko dute. Lezoarrak bigarren dira bere multzoko sailkapen nagusian (19 puntu), eta arabarrak seigarren, sei punturekin. Beraz, beste garaipen bat zakura eramateko aukera ona du Jaixkik.
Allerruren gizonen talde nagusiaren partida ere larunbatean da, 16:30ean, Hernaniko Zubipe zelaian. Ligan orain arte jokatutako bi partidetan berdinketa lortu duten lezoarrek (lehena urrian, bestea joan den asteburuan). Beraz, garaipen gosez joango dira Zubipera zuri-berdeak. Hernani kontrario gogorra da, ordea: jokatutako partida bakarrean (urrian izan zen; joan den asteburuan ez zuten jokatzerik izan) garaipena lortu zuten.
