Pentsioetan ere, ezabatu beharreko arrakala
Emakume pentsiodunen artetik, heren batek soilik du bere lan-bizitzari lotutako pentsioa; gainontzekoek alarguntza pentsioa jasotzen dute, eta bataz beste, gizonek jasotzen dutena baino %36 baxuagoa da.
Datorren astelehenean kalera aterako da Duintasuna. Hutsik egin gabe, pentsio, zahartzaro eta bizitza duinen aldeko aldarria zabalduko dute kaleetan. Oraingoan, beraien jardunean berria ez bada ere, genero arrakalarekin amaitzea eskatuko du pentsiodunen mugimenduak; soldatetan bezala, pentsioetan ere gizon eta emakumeen arteko pitzadura hori nabarmena delako.
Emakume pentsiodunen artetik, heren batek soilik du bere lan-bizitzari lotutako pentsioa; gainontzekoek alarguntza pentsioa jasotzen dute, eta bataz beste, gizonek jasotzen dutena baino %36 baxuagoa da.
Azken mobilizazioetan bezala, astelehenekoan ere Toledoko Ituna eta haren inguruko gomendioak izango ditu Duintasunak jomugan. Ez alperrik. Itun horretako hiru puntuk —13,15 eta 17ak, zehazki— lotura zuzena dute elkartearen esanetan pentsioetan dagoen genero arrakalarekin, “eta hirurek planteatzen dute egungo prestazioak okertzea”.
Pentsio baxuenak jasotzen dituztenen artetik gehienak emakumeak dira Duintasunak azaldu duenez, eta genero arrakalari aurre egiteko kotizazio gabeko pentsioen sistema berrikustea galdegin du: “Hilean 402 eurorekin ez delako nahikoa bizitzeko; berdin alarguntza pentsioarekin, horren bataz bestekoa hilean 700 euro dira”.
Ondorioa: ezinbestekoa da 1080 euroko gutxieneko pentsioak ezartzea, “Europako Karta Sozialak eskatzen duen 1.200 euroen Lanbidearteko Gutxieneko Soldataren %90”.
Astelehenean kalea hartuko dute berriro pentsio eta zahartzaro duin baten alde, eta diskriminazio eta desberdintasunen aurka.
Hitzordua, 11:00etan Herriko Plazan.
