Geltokiaren Plataformak alkateari erantzun dio: "Nahastearen artista zara"
Antxoko Tren Geltoki Berriaren Plataformak azaldu du euren proposamena eta Adifena konbinagarriak direla, "borondate" kontua dela biak aintzakotzat hartzea.
Pasaia Antxoko Tren Geltoki Berriaren Plataformak azken plenoan Izaskun Gomezek euren proposamenari emandako ultimatumari erantzun dio. Antxotarrek uste dute alkatea errealitatea aldatzen ari dela: “nahastearen artista zara”. Izan ere, euren planak ez luke Adifena kondenatuko, biak konbinagarriak baitira.
Erantzun argiak exijitu dizkiote alkateari, “abstraktuki” hitz egiteari uzteko eta argumentuak eman ditzan azaltzeko zergatik ez den posible izango Antxon bulebarra sortzea hurrengo 15 urteetan gutxienez. Gainera, epe luzeko iragarpen horrekiko harridura azaldu dute: “Zure legealdeari bi urte gelditzen zaizkio eta inork ez daki zein izango den hurrengo alkatea. Edo ziurtzat jotzen duzu karguan jarraituko duzula?”.
Udal gobernuari galdegin diote zergatik eman ote zuen proposamenaren aldeko bozka, gero hori babesteko “ezer egin ez baduzue, hala askoz okerrago gelditu baitzarete”. Alkateari publikoki agertu eta azalpenak eman ditzan eskatu diote, herritarrak informatzeko.
Azkenik, gogora ekarri dute ez dutela etsiko, sinetsita baitaude herri proposamena egingarria dela, borondate eta gogo kontua besterik ez dela hori gauzatzea.