Lurbizi egitasmoak Landaola Saria jaso du
Erakunde publikoek sustatutako iniziatiben artean onena dela iritzi du Landaolak. Landa garapen elkarteen federazioak ematen du saria.
Jexux Leonet alkateak eskerrak eman ditu sariagatik [Arg.: @landaola_]. Gipuzkoako landa garapen elkarteen federazioa da Landaola, eta gaur banatu ditu, laugarren aldiz, Landaola Sariak. Sari banaketa modu telematikoan egin dute, COVID-19a dela eta.
Oiartzungo Udalak saria jaso du, erakunde publikoek sustatutako iniziatiben sailean. Zehazki, udalaren Lurbizi egitasmoa saritu du Landaolak, lau hautagairen artean.
Lurbizi lehen sektorea bultzatzeko plana da. 2016an jarri zuten martxan, herriko lehen sektoreari buruzko diagnosia egin ondoren. Lurbiziri esker, besteak beste, Makutsoko baratzeak —Elika kooperatibak eta Arraztalo elkarteak kudeatutakoak— lagundu dira, baita Larremotx gaztandegia eta Labore Oarso ere.
Jexux Leonet alkateak eskerrak eman dizkie udalaren izenean: “Oiartzungo Udalarentzako lehenengo sektorea garrantzitsua da, eta kontziente gara zailtasun asko dituen sektorea dela. Horregatik, Oiartzunen lehenengo sektorean aritu nahi dutenek jakin dezatela Lurbizi egitasmoaren eta Udalaren laguntza izango dutela”.
