COVID-19aren krisiari aurre egiteko bizitzak erdigunean jarri behar direla uste du Emagin elkarteko kideak. Aldaketarako, ordea, ausardia politikoa beharrezkoa dela adierazi du.
Miren Aranguren Etxarte. 
Hilaren 17an, Gezala Auditoriumean (19:30) hitzaldia emango du Emagin elkarteko Miren Aranguren Etxartek. COVID-19ak emakumeengan eta berdintasunean izan duen eraginaz mintzatuko da.
Hilaren 17ko hitzaldian, zein izango da abiapuntua?
Emaginen, mugimendu feministetan eta bestelako herri mugimendutan egin den gogoetaren berri eman dute: koronabirusarena ez da osasun krisia bakarrik. Sistema osoaren krisi baten aurrean gaude. Proiektu zibilizatorioaren oinarriak daude kolokan. Egia da larrialdia eragin duela, baina elkarrekin konektatutako hainbat krisirekin egin dugu topo: biodibertsitatearen galera, klima aldaketa, energia eta materialen gainbehera, nahitaezko migrazioa, pobrezia, arrazakeria, espezismoa… Eta horretan kokatu behar dugu ere mugimendu feministak hainbatetan aipatu duen zaintza krisia.
Aldaketarako tarterik ba al da?
Azalera atera den guztia, orain gutxira arte nahiko ezkutuan zegoen. Eta horrek aldaketa eragin dezake. Gauza da noranzko aldaketa behar duen izan: justizia sozialean sakontzeko izan behar duen, edo berriz ere sistema kapitalista, heteropatriarkal eta kolonialaren oinarriak indartzeko izango ote den. Ausardia politikoa behar da aldaketarako. Blokeo egoeran gaude, jakinik oso egoera ezegonkorrean gaudela sozialki. Badugu nondik hasi, ordea. Hasteko aitortu behar da zergatik gauden egoera honetan.
Eta testuinguru horretan zaurgarrienetakoak emakumeak izan dira.
Alde batetik bai, esan daiteke krisi honen eraginaren zati bat emakumeek jasan dutela. Baina ez guztiek, eta ez neurri berdinean. Sistema honek produktibotzat eta errentagarritzat ez dituen izaki-gizaki guztiak izaten ari dira kaltetuenak. Esan izan dute birusak ez duela ulertzen ez klase sozialez, genero zapalkuntzaz, arrazakeriaz… Baina argi dago jendea ez dela berdin kutsatzen, gaixotzen edo sendatzen, denek ez dauzkagulako baliabide berberak. Hartu diren neurriek pertsona batzuek oso egoera zaurgarrian jarri dituzte, esaterako etxeetako langileak, egoera erregulatu gabe dutenak zehazki: kale gorrian aurkitu dira askotan. Edo indarkeria sexista jasan dutenak ere nora jo jakin gabe aurkitu dira. Baliabideak jarri dira toki jakin batzuetan, eta beste batzuetan, sektore feminizatu eta prekarioetan batez ere, ez. Krisi honek beharrezkoa zer den, zer den oinarrizkoa erakutsi digu. Bizitzak erdigunean jarri behar dira.
EGITARAUA
Lezoko Udalak eta herriko hainbat eragilek (Pasaia-Lezo Lizeoa, Lezo Institutua, Lezo Herri Eskola, Kuadrillategi, Lezoko osasun zentroa eta Gaxuxa) Emakumeen Egunari begirako hainbat ekitaldi antolatu dituzte. Horietan parte hartzeko gonbita egin diete lezoarrei, «guztion indarrak batuta, emakumeen eskubideen alde egiten jarraitzeko eta gizon zein emakumeen arteko berdintasuna aldarrikatzeko». Lehena, atzo (osteguna) egin zuten Gezalan. Virginia Imazek Pronoia antzezlana taularatu zuen. Behekoak dira besteak.
HILAREN 8TIK 13RA
Erakusketa
Hainbat ordutan. Gaxuxa emakumeen elkartearen erakusketa Kultura Aretoan. Hilaren 8an, 17.00etatik 19.00etara zabalik, eta hilaren 9tik 12ra 11.00etatik 13.00etara eta 17.00etatik 19.00etara. Hilaren 13an (larunbata) 11:00etatik 13:30era irekiko dute.
HILAK 17an
Hitzaldia
19:30. Gezala Auditoriumean, Emagin elkartearen eskutik, Agerikoak eta ezkutukoak: bizitzak erdigunean COVID-19 garaian hitzaldia.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
