Berdintasunak ere duintasuna barnebiltzen duelako
Mugimendu feministak Osakidetzako langileen, etxeko zaintzaileen, erresidentzietako beharginen zein jubilatuen arazoen gainean jarri ditu fokuak zubien bueltan egindako ekintzan.
Lau zubietan pankarta bana jarri dute. Ezohiko baldintzetan ospatutako Martxoak 8 da gaur, eta Errenteria-Oreretako mugimendu feministak ohikoa ez den ekitaldia egin du gaur arratsean, Oiartzun ibaian ardaztuta.
Lekuona, Ugarritze, Panier eta papelerako zubietan beste hainbeste kolektiboko ordezkariak kokatu dira. Ibaiaren ertz luzean, herritar olatua, “sistema arrakalatzearen” aldeko aldarriak batuta.
Irrintzi eta txalapartarekin hasi dute ekitaldia, eta jarraian Alaia Martin bertsolariak bilbatu ditu lau kolektiboen aldarrikapenak.
COVID-19ak sortutako osasun krisiak hiru kolektibo feminizaturen egoera larria —are gehiago— azaleratu du: Osakidetzako langileak, etxeko langileak eta zaharren egoitzetakoenak. Laugarren zubian urteak kalera ateratzen ari den kolektiboa zegoen ordezkatuta: jubilatuena.
Soldata arrakala eta babesgabetasuna
Kolektibo bakoitzaren gainean fokua jartzeko hitza hartu dutenean, eskaera komun bat izan dute: duintasunarena. Azken urte honetan lehen lerroan egon diren Osakidetzako langileen %80 emakumeak direla gogorarazi dute, eta soldata arrakala dagoela gizon eta emakumeen artean. “Ez da kasualitatea”, ebatzi dute.
“Ardura duen bakarra produkzioa dela argi utzi dute. Txaloez harago, zaintza lanen aitortza exijitzen dugu”, adierazi dute.
Etxeko langileen egoera izan dute hizpide. Gehienek paperik gabe egiten dutela lan nabarmendu dute, eta urte honetan zehar askok lana galdu dutela.
Lanik galdu ez dutenen artean, baldintzek okerrera egin dutela azaldu dute. Are gehiago. Gainera, arrazoirik gabe kaleratu ditzaketela salatu dute. Beraien lanari dagokion soldata irabaztea eskatu dute.
Erresidentzietako egoera prekarizatua ere gogorarazi dute, baita zaintza lanetan aritzen diren langile horiek duten borrokaldi luzea ere. Jubilatuentzako pentsio duinak galdegin dituzte.
Gaua eta egunaren arteko borrokaldian egin dute ekitaldia. Ilunak argia garaitu ez zezan, mugimendu feministako kideek zuziak piztu dituzte, berdintasunaren bidea argitzeko. Iparrorratza dute: duintasuna da.
