Saririk ez Pasaia Kayak taldearentzat Euskadiko Txapelketan
Igandean Irunen jokatu zen Euskadiko Neguko Ur Lasaietako Piraguismo Txapelketan ez zuten podiumean posturik lortu pasaitarrek.
Carlos Jafet jubenila lehia bizian, domina lortzeko borrokan. 
Ez zuen zorterik izan Pasaia Kayak taldeak igande goizean Irunen jokatu zen Euskadiko Neguko Ur lasaietako Piraguismo Txapelketan, eta esku hutsik itzuli behar izan zuen Oarsoaldera.
Taldeak adierazi du hainbat baja garrantzitsurekin heldu izana gutxi balitz, beste hainbat oztopo gehitu zitzaizkiela egunean bertan: “Gauzak erabat okertu zitzaizkigun gure bi aukera garbienekin. Hainbat kanporaketa izan ziren gizonezko seniorren kategorian irteeran sortu zen nahaspilaren ondoren, epaileen aginduak ez baitziren ondo entzuten, megafonia baliabide eskasen ondorioz”.
Pasaitarrek onartu dute “kolpe gogorra” izan zela hura, baina emakumezkoen jubenilen mailan etorri zen hurrengoa: “Buruan egoteko borrokan hautagai zen Laura Zunzunegui antxotarrak aukera ia guztiak galdu zituen irteeran, ibaiaren alde txarretik irtetea egokitu zitzaiolako, eta hasieratik geratu zen atzean inolako aukerarik gabe”. Azkenean, dena den, bosgarren izan zen, podiumetik ez hain urrun. Bosgarren izan ziren, halaber, beren kategorietan, beste bi kirolari pasaitar: Asier Amiama 23 urtez azpikoa eta Aitor Arrieta beteranoa.
Podiumerako lehian ibili eta aukerak izan zituen ordezkari pasaitar bakarra Carlos Jafet jubenila izan zen, baina lauko talde batean jokatu zuen esprintean brontzeko domina, eta laukote horretako azkena izan zen, hirugarren postutik 2 segundo pasatxora amaituz.
Taldekako sailkapenean ere goiko postuetatik urrun geratu ziren pasaitarrak. Dena den, ez dute amore emango: “Orain zauriak sendatu eta datorren larunbatean Gipuzkoako Txapelketa ondo prestatzen saiatuko gara”.
