Sei domina Pasaia Kayakentzat, Gipuzkoako Neguko Txapelketan
Orain arte parte hartutako Gipuzkoako txapelketetatik domina-uzta ugariena lortu dute. Saritutako gehienak emakumeak izan dira.
Sara Tarragona esfortzu betean, helmugaratzen. 
Arantza atera zuen Pasaia Kayak taldeak larunbatean Zumaian 5.000 metroko distantzian jokatutako ur lasaietako Gipuzkoako Neguko Txapelketan, aurreko igandean Irunen izandako emaitzen ondoren, eta orain arte parte hartu duen Gipuzkoako txapelketa guztietan lortutako domina-uzta ugariena lortu zuen.
Ion Carballok lortu zuen txapela gizonezko senior kategorian, azken esprintean Martin Egaña zumaiarra estu baina nagusitasunez garaitu ondoren, segundo eta erdi pasatxoko tartearekin. Atzetik, Iñigo Loisek lortu zuen kategoria horretako hirugarren postua, podiuma osatzeko.
Laura Zunzunegui juniorrak ere bere maila eman zuen igandekoan, eta bera izan zen Eider Amundarain irundarrari ezin izan bazion irabazi ere, meritu handiko zilarra lortu zuen, harengandik 2 segundo eskasera.
Eukene Saez eta Sara Tarragona errenteriarrek emakumezko seniorren eta 23 urtez azpiko emakumeen kategorietan hurrenez hurren lortu zuten zilarrezko domina bana, beren lana txukun bete ondoren, eskarmentuz eta trebeziaz. Itxaropentsu dago taldea emakumeekin.
Hirugarren izan zen Pasaia Kayak taldekako sailkapenean, eguneko seigarren dominatzat har daitekeena lortuz, Santiagotarrak talde garailearen eta Zumaiako Itxas-Gainen atzetik. Taldekako lehenengo podium-postua izan da Oarsoaldeko taldearentzat orain arte jokatuko hiru lehiaketetan.
