Jamaica Kincaid izango da Irakurketa Taldearen saioko protagonista
'Nire amaren biografia' izeneko liburua aztertuko dute Irakurketa Taldekoek. Datorren hilerako, Unai Elorriagaren 'Iturria' irakurriko dute.
Jamaica Kincaid (Saint John's, Antigua; 1949). Oiartzungo Irakurketa Taldea gaur arratsaldean elkartuko da, Jamaica Kincaiden Nire amaren biografia liburuari buruz aritzeko. 20:00etan jarri dute hitzordua, liburutegian.
Antigua uhartean jaiotako idazleak Xuela Claude Richardson fikziozko pertsonaiaren biografia idazten du, bere bizitzaren 70 urteei errepasoa emanez.
Karibeko Dominika uhartean kokatuta dago istorioa. Protagonistak ama galtzen du txikia denean, eta haurtzarotik heldutasunera egiten duen bidaia deskribatzen du Kincaidek. Ez du argumentu tradizionalik, baina pertsonaiak modu sakonean landu zituen idazleak, ez ohiko deskripzioak eginez.
Elorriaga, apirilerako
Aste Santuko oporraldia izan daiteke, itxiera perimetralik balego, Unai Elorriagaren Iturria liburua (Susa, 2019) irakurtzeko momenturik aproposena. Apirilaren 20an komentatuko du liburua. Honakoa da sinopsia:
Pedro Iturriak obsesio bat dauka: ipuin itxurako testuak idazten ditu. Ez dakigu jatorriz zer hizkuntzatan idazten dituen, baina badakigu Txekian txekieraz argitaratzen duela, Hungarian hungarieraz. Soro Barturenen gaztetako laguna da Iturria, eta Sorori iruditzen zaio berari buruz ari dela ipuinotan, berari begira idazten dituela.
Horregatik ari dira agian Soro eta Erroman Iturriaren bila Europan zehar: hegazkinak hartzen, hoteletan lo egiten, laster laurogei urte izango dituzten arren. Herrialderen batean Iturriaren ipuinen bat argitaratu dela dakiten bakoitzean hara abiatuko dira: itzultzaile bat lortu, ipuina irakurri, Iturria non bizi den ikasi… Baina ez dute hain erraz topatuko laguna.
