AEK babesteko ekitaldia, igandean
Oarsoaldeko AEK euskaltegiek ekitaldia antolatu dute iganderako, Errenteria-Oreretako Gamon Zumardian. Euskaltegiak babesteko deia egin dute.
AEK-k Bultza euskaltegiak! Euskara! dinamika abiatu du. Dinamikaren ardatzak hiru dira: administrazioaren eta eragileen inplikazioa; herrietan ekitaldiak egitea; eta AEKren aldeko babes ekonomikoa eskatzea. Izan ere, aurten Korrika ez egitea oso kaltegarria da AEK euskaltegientzat, eta hori iraultzeko abiatu dute dinamika: «Korrikaren atzerapenak hutsunea sortu du. Kolpe ekonomiko handia ekarri digu, eta euskaltegi sendoak behar ditugu».
Horren harira etzi Hondarribian, Irunen eta Errenteria-Oreretan ekitaldiak antolatu dituzte Oarso Bidasoko AEK euskaltegietako arduradunek. Horrez gain, HITZAk gaiari buruzko gehigarri berezia publikatu du martxoaren 26ko astekarian. Sakatu hemen deskarga egiteko (PDF artxiboa da).
Errenteria-Oreretan, 12:00etan, Gamon Zumardian
Errenteria-Oreretako ekitaldia etziko (igandea) 12:00etan hasiko da, Gamon Zumardian. Oarsoaldeko euskaltegiek antolatu dute. Jon Martin bertsolari oiartzuarrak hasiko du saioa, eta ondoren Ilargi Arrizabalaga abeslari lezoarrarekin batera Euskal Herrian euskaraz kantatuko dute zumardian daudenek. Aldi berean, Gorka Cobos graffiti egile oreretarrak ekarpena egingo du ekitaldian zehar, eta nola ez, ez da faltako Oarsoaldeko AEK-ko irakasleren baten mezua. Talde argazkia ere aterako dute.
AEKtik adierazi dute aurten ere kalean nahi dutela euskararen lekukoa eta euskaltegien aldeko bultzada. Horri begira, haien webgunean diru ekarpena egiteko bidea jarri dute euren webgunean.
