[Galeria] Udaberria zumardian loratu da
Errenteriako XII. Lore eta Landare azoka egin dute gaur goizean Gamon Zumardian. Jendetza hurbildu da jarri dituzten postuetara.
Errenteriako XII. Lore eta Landare azoka ospatzen ari dira Gamon Zumardian. Lore eta landareak ikusteko aukeraz gain, kosmetika naturala, sendabelarrak, hazi eta lore lehorrekin egindako artisau lanak daude postuetan jarrita.
Jende ugari hurbildu da goiz-goizetik herriko gune neuralgikora. Zer ikusi, zer probatu, eta —ekoizleek eskertuko zuten— zer erosi izan da plazan. Nabari da udaberria iritsi dela, bai eguraldiarengatik, baina baita ere herritarrek ekitaldien beharra dutelako. Erleak loreetara hurbiltzen diren bezala gerturatu dira postuetara.
2002an hasi zen Behemendi elkartea baserritarren produktuen azoka bereziak egiten, eta Errenteriako Udalarekin elkarlanean 2004an. Azoka antolatzeko arrazoia, egun baserritarren produktuen feriek bizi duten beherakada da. Hala ere, poltsa beteekin ikusi dira hainbat eta hainbat.
