1.781 lagunek eskatu dute PCR proba egiteko hitzordua ordubetean
Gaur 08:30ean zabaldu dute PCR proba horiek egiteko hitzordua eskatzeko epea, eta hogei minutuan agortu dira hiru egunerako aurreikusita zituzten zitak. Agenda berria zabaldu dute.
COVID-19aren proba tutua Atsedenik gabe jotzen ari dira telefonoak Iztietako anbulatorioan. Ohiko jarduna zaila izaten badute, Osakidetzak eta Eusko Jaurlaritzaren Osasun Sailak atzo egin zuen baheketa masiboaren deialdiaren harira, lanez gainezka ari dira dei guztiei ahalik eta azkarren erantzuteko.
Gaur 08:30ean zabaldu dute PCR proba horiek egiteko hitzordua eskatzeko epea, eta hogei minutuan agortu dira hiru egunerako aurreikusita zituzten zitak. Hala jakinarazi du Eider Alberdik, Iztieta Anbulatorioko arduradunak: “Agenda berria zabaldu dugu herritar guztiei erantzuteko”. Alberdik emandako datuen arabera, lehen ordubetean, 1.781 lagunek eskatu dute PCR proba egiteko hitzordua gaurtik eta ostegunera arte. Momentuz, gaur arratsaldean, 516 lagun pasako dira Merkatuzarretik baheketa masiboaren harira proba egitera. Bihar, 639 izango dira; eta etzi, 626. Aurretik aipatu moduan, baina, horiek gaurko 09:30ean zituzten datuak dira.
Ostegunera arte daukate aukera PCR proba egiteko hitzordua eskatzeko martxoaren 14tik atzora arte Zumardian, Diputazio plazan eta horien inguruko tabernetan izan ziren herritarrek, eta espero da, beraz, hasierako kopuru hori handitzea, epea zabala delako, baita eragin nahi duten eremua ere. Horren gainean ere galdetu dio HITZAk anbulatorioko arduradunari: “Denbora tartea hori, eta eremu horiek kontuan hartu badira baheketarako, beharrezkoa delako izan da. Egoerak markatzen du zein epe eta zein espazio hartu behar ditugun kontuan, eta horri erantzuten zaio”.
Halako baheketa masiboetan konfinamendu prebentiborik ez dela ezartzen azaldu du, baina Osasun Sailak gogorarazi egin du COVID-19arekin bateragarriak diren sintomak dituzten herritarrek —sukarra, eztula, arnasa hartzeko arazoak— etxean egon behar dutela eta osasun zentrora deitu behar dutela horren berri emateko.
Gaurtik ostegunera arte dute PCR proba egiteko hitzordua eskatzeko aukera Iztietako osasun zentroaren 943 00 79 40 telefono zenbakira deituta dago (08:00etatik 20:00etara), baita osasun kontseiluko telefono zenbakira deituta ere, 900 20 30 50.
