Oiartzun eta Lezo, bihartik itxita
Bi herrietako tasak 400dik gorakoak izatera pasa dira, beraz, Osasun Saila horien itxiera nahiz ostalaritzarako muga gehiago ezarriko ditu.
Azken egunetan gora egin du Oarsoaldeko herri guztietan COVID-19agati kutsatuen kopuruak. Horrek eragin berezia izan du Oiartzunen eta Lezon, 100.000 biztanleko 400eko tasa gainditu baitute, atzoko datuen arabera, bi udalerriek. Horrek esan nahi du Jaurlaritzak gaur ebatziko duela bien itxiera perimetrala, eta ostalaritzarako hainbat muga ezarriko dira (gune horietako barrualdeak ixtea, eta horiek gosaritarako edo bazkaritarako soilik irekitzea 06:30etik 09:30era goizez, eta 13:00etatik 16:30era arratsaldez). Errenteria-Oreretako tasa, aldi berean, nabarmen hazi da azken egunetan baina ez du 400eko langa pasa. Lasaiago dabiltza Pasaian.
Herriz herrikako tasen datuen azterketa asteartetan egiten du Osasun Sailak, eta asteazkenetan jartzen dira indarrean, herriek 400eko tasa gainditzen badute, horren araberako murrizketak. Beraz, Lezo eta Oiartzun astebetez izango dira itxita gutxienez.
Joan den asteko ostegunetik, atzora arte, honakoak dira Oarsoaldeko herrietan atzeman diren positiboak. Lehen zenbakia hilaren 1ekoa da (osteguna), eta azkena atzokoa (astelehena). Tartean dauden hiruak ostiralekoak, larunbatekoak eta igandekoak dira:
- Oiartzun (ostegunetik atzora arte): 6-3-3-7-3. Tasa: 540,07 (martxoaren 17an 77,15koa zen tasa).
- Lezo (ostegunetik atzora arte): 0-2-4-4-0. Tasa: 427,63 (martxoaren 17an 82,24koa zen tasa).
- Errenteria-Orereta (ostegunetik atzora arte): 15-9-9-12-20. Tasa: 348,47 (martxoaren 17an 87,12koa zen tasa).
- Pasaia (ostegunetik atzora arte): 4-7-4-2-2. Tasa: 257,15 (martxoaren 17an 227,25koa zen tasa).
