Gurutze Gorria beharra duten haurrentzako elikagaiak biltzen ari da
Oiartzungo Alcampo kanpoaldean larunbatera arte egongo dira janari bilketan. Dirua ere eman daiteke. Aurtengoa bederatzigarren aldia izango da.
Gurutze Gorriak bederatzigarren aldiz egingo du janari bilketa. Errenteria-Oreretako Gurutze Gorria janari bilketa egiten ari da Oiartzungo Mamut merkatalguneko Alcampo saltokiaren kanpoaldean. Gosari eta askariak bihotzarekin leloarekin egiten ari dira kanpaina, eta larunbatera arte egongo dira han (09:00etatik 22:00etara). Elikagaiak zailtasunak dituzten haurrei bideratuko dizkiete.
Aurtengo kanpaina bederatzigarrena izango da, eta berritasun bat izango du. Estreinakoz, ekarpen ekonomikoa egin ahal izango da. Erosketa txarteletara bideratuko da, eta Gurutze Gorriak txartel horiek erabiliko ditu haurrentzako elikagaiak erosteko.
36 boluntario arituko dira lanean larunbatera arte, txandaka.
Metodologia berri horren onurak zerrendatu ditu Gurutze Gorriak:
- Jasotako laguntza “duintzen” du, behin eta berriz karga daitekeen txartel elektroniko jasotzen dutelako eta tokian tokiko dendetan gasta daitekeelako.
- Familia bakoitzaren elikadura beharrizanetara moldatzen da laguntza.
- Tokiko ekonomia sustatzen du.
- Logistikako kostuak aurrezten laguntzen du, eta elikadura kateko galerak saihestu.
- Elikagaiak garraiatzean gerta daitezkeen galerak saihesten ditu.
- Pandemia garai honetan elkarren arteko kontaktua gutxitzen du.
- Biltegien beharra txikiagoa da, elikagai loteak ez direlako eskatu behar.
- Karbonoaren arrastoa gutxitzen da, ibilgailu erabiltzen direlako.
- Dieta hobetzen du, elikagai fresko eta iraungitze-datadunak eros daitezkeelako.
Erakundeak azaldu duenez, Gurutze Gorriko 36 boluntariok hartuko dute parte bilketan, goiz eta arratsaldeetako txandetan banatuta.
Bukatzeko, esan dute “oso garrantzitsua” dela metodologia horretara moldatzea. “Fidagarritasun eta trazabilitatea erabat bermatuta ditu”, gaineratu dute.
