[Galeria] "Nazkatuta" daudela berretsi dute ikasleek
Ikamak antolatuta, mobilizazio eguna zuten gaur. Oiartzungo plazan elkarretaratzea egin dute, "korbatadunek bulegoetan" hartutako erabakiak salatzeko.
![ikama oiartzun](https://oarsoaldea.hitza.eus/site/files/2021/04/ikama-oiartzun-1.jpg)
Ikama ikasle erakundeak deituta, mobilizazio eguna izan dute gaur hezkuntza zentroetan. Oiartzunen kasuan, 12:00etan elkarretaratzea egin dute Done Eztebe plazan.
“Nazkatuta” daudela adierazi dute, hitzez eta performance baten bidez. Egoera horretan egotearen arrazoia azaldu dute: “Ikasturte hasieratik daramagu haien bulegoetan eserita dauden korbatadun politikarien kudeaketa negargarria jasaten”. Arduradun politikoei “utzikeria, nahasmena eta kontraesanak” egotzi dizkiete.
Egoera ikasleek ordaindu behar izan dutela salatu dute, konfinatuta egon ez diren egunetan ikasgelan —neguan— “leihoak irekita” egon direlako. Kalean hiru lagunekin bakarrik egon daitezkeen bitartean ikasgelan 30ekin batera egon behar dutela gaitzetsi dute.
Gaineratu dutenez, etxean egon behar duten egunetan beraiek aurkitu behar izan dituzte eskolak jarraitzeko tresnak. “Bitartean”, jarraitu dute, “isilik eta eserita egotera behartu nahi izan gaituzte. Kamerak jarriz, kontrolerako plataforma digitalak indartuz eta jarrera autoritarioak normalizatuz, ikasleon eskubideak murriztu izan dituzte eserita egotera behartu gaituzten bitartean”.
Ikasleei zer sentitzen duten galdetu ez dietela ere salatu dute.
Azterketa garaia, gainean
Azterketa garai “magikoa” ate joka dagoela gogorarazi dute, eta horrek eragiten dituenak nabarmendu nahi izan dute: “Presioa, itoaldia, ikasketa ordu bukaezinak… Gure bizitzak alde batera utzi eta buru belarri edukiak irentsi eta botatzeko prestatzen ari dira gure buruak”.
Hezkuntza sistemarekin, azterketetarako eserita ikasteaz zein selektibitateaz “nazkatuta” daudela berretsi dute. “Martxan egoteko arrazoiak” dituztela adierazi, eta bihar sektore publikoko langileekin egongo direla iragarri dute. “Haien lan eskubideen defentsa egiteaz gain, Euskal Herriarentzako zerbitzu publiko, indartsu eta kalitatezkoen alde martxan egongo gara. Ikasleok hezkuntza sistema publiko erreal baten beharra dugulako”.
Bestalde, ikasturte bukaeran “argi txinpartak” ikus daitezkeela esan dute. “Nazka eta amorrutik datozen txinpartak izan daitezke, bai, baina txinparta txikienek ere suterik handiena sor dezakete egoera beroenetan”.
Horrela, ziurtatu dute ezingo dietela kendu “martxan eta borrokan” aritzeko gogoa. Beraien helburua beste nolabaiteko hezkuntza eredu bat eraikitzea da. “Euskal Eskola Herritar eta Burujabearen alde martxan jarraituko dugu!”. Ikastetxeetan antolatu eta kaleak hartuko dituztela ziurtatu dute.