Oiartzunek Azkoitia eta Olaberriaren kontra hasiko du herriartekoa
Esku huska urolatarren kontra hasiko dira, eta palan, berriz, goierritarren aurka. Bestalde, Oiarpekoek finalerdi ugari dituzte asteburuan.
Madalensoro pilotalekuaren erabilera dezente haziko da datozen egunetan. Maiatzaren 2an hasiko da 2021eko Gipuzkoako Herriarteko Pilota Txapelketa. Atzo egin zuten kanporaketen zozketa, eta oiartzuarrek badakite zeintzuk izango diren beraien arerio.
Palistek Olaberriaren kontra jokatuko dute, maiatzaren 2an eta 9an. Kanporaketa gainditzen duenak, Errenteria-Oreretako taldea edukiko du zain finalerdietan.
Esku huska aritzen direnek, berriz, Azkoitia izango dute pare pare. Beraien kasuan, beranduago hasiko dira: maiatzaren 16an eta 23an. Irabazten duenak Bidania-Goiatz edo Amezketaren kontra jokatuko du.
Pilota egokituko txapelketa
Euskal Pilota Egokitutako Master Cup Txapelketak inoizko parte hartzerik handiena izango du. Aurten Oiartzun eta Getarian jokatuko dira partidak.
Denera 34 pilotari arituko dira, 18 adimen urritasuneko mailan, (3 taldetan banatuko diren 9 bikotetan) eta 16 gurpildun aulkiko mailan (2 taldetan banatutako 8 bikotetan). Izen emandako pilotarien artean Bizkaia, Gipuzkoa, Nafarroa, Errioxa eta Frantziako pilotariak daude.
Osasun egoerak baldintzatuta pilotalekura gerturatzerik izango ez denez, Oiartzungo kanporaketak Emakume Master Cupeko Facebookeko profiletik jarraitu ahal izango dira streaming bidez.
Goizez adimen urritasuneko partidak jokatuko dira eta arratsaldez gurpildun aulkian aritzen diren pilotarien txanda izango da.
Lau bikoterik onenak maiatzaren 16an Getarian jokatuko diren finaletarako sailkatuko dira. Eguerdiko 12etatik aurrera jokatuko diren final hauek ETB-1ek zuzenean eskainiko ditu.
Oiarpekoek, finalerdi ugari
Oiarpeko pilotariek hamabi partida jokatuko dituzte asteburuan, eta horietatik 11tan dituzte finalera pasatzeko aukera. Kartelera osoa hemen klik eginda ikus daiteke.
