Apirilaren 3an Oiartzunen egondako sutea "nahita" piztu zela salatu du Eguzkik
Talde ekologistak adierazi duenez, sua "abeltzainen interesekin" lotuta dago. Aldundiari, udalari eta fiskaltzari eskatu diote ikerketa abiarazteko.
Eguzkik helarazitako argazkia.
Eguzki talde ekologistak apirilaren 3ko sutea “nahita piztutakoa” dela salatu du. “Berriz ere nahita sortutako sute bat abeltzaintzaren interesekin lotuta egotearen zantzuak daude, Ingurumenari, legeei eta herri mendiei muzin eginez”, adierazi dute.
Hamabi hektarea erre zirela adierazi dute, herri lurretakoak guztiak. “Iruarrita eta Urkullu aldean zetorren baso naturalaren eta bertan bizi zen fauna eta floraren desagerpena ekarri du, lurzoruaren gehiago pobretzeaz eta galtzeaz gain”.
Ingurumeneko Fiskaltzari, Oiartzungo Udalari eta Gipuzkoako Foru Aldundiari esku hartzeko eskatu dio talde ekologistak. “Fiskaltzari eta Aldundiari dagokie baso sutearen ikerketa hastea eta egileak identifikatzea, dagoen inpunitatea eteteko asmoz”, gaineratu dute. Oiartzungo herri larreetan bazkatzeko baimendutako erabiltzaileen erregistroa ikertzeko eskatu dute.
Udalari, berriz, exijitu diote urtero “abeltzaintzari bideratzen dizkioten 30.000 euroak” berrikustea, “oiartzuar guztien dirua” delako. Horren ordez, partida hori edo kopuru handiagoa baso eta erreka publikoetako bioaniztasuna berreskuratzera bideratzeko eskatu dute.
“Aldi berean”, jarraitu dute, “udalari eskatzen diogu Oiartzungo mendi publikoetan abereak dituztenen udal erregistroa datuak erraztu ditzala”.
