Asteburuan estreinatuko dute, Bilbon, Labandibarren 'Salaketa'
Pabellon 6 aretoko teatro laburraren zikloan taularatuko dute oiartzuarraren antzezlana. 2019ko Cafe Bilbao Teatro Labur Saria irabazi zuen.
Goiatz Labandibar idazle oiartzuarrak gidoi onenaren saria eskuratu zuen 2019ko Cafe Bilbao teatro labur sarietan, Salaketa lanarekin.
Asteburu honetan, Bilboko Pabellon 6 aretoak antolatutako antzerki laburraren zortzigarren zikloan ikusteko aukera izango dute bertara joan daitezkeenek. Gaur, bihar eta etzi jokatuko dute Gaizka Chamizo eta Mikel Martinez aktoreek Labandibarren antzezlana. Informazio gehiago lor daiteke aretoaren webgunean.
Itxiera perimetrala gainditu ezinda, aktore horiek egin zuten irakurketa dramatizatuarekin goza daiteke (sinopsiaren azpialdean).
Antzezlan honek asko du absurdotik. Abiapuntua bera, nahiko absurdoa da: pertsona bat salaketa bat jartzera doa igarle batek esan ziona ez delako bete.Egoera sinple horretatik abiatuta, salaketa jartzera joan denaren eta hari harrera egin dion justizia administrazioko langilearen arteko elkarrizketa da gidoiak hartzen duena. Bai bata eta bai besteak salaketa jartzea, arrazoia, jokabideak… absurdora eramaten dituzte, mila ergelkeriatan katramilatzen dira.
Gidoi umoretsu, ironiatik eta absurdotik asko duena eta gure buruari barre egiteko aukera ematen duena.
Gizarte honetan gauza batzuen inguruan nahiko zabalduak dauden usteak eta klitxeak ere azaleratzen dira. Izan ere, absurdoaren antzerki honek kritikatik ere badu: sistema judiziala, fedeak, jendeak zertan sinisten duen edo zertan sinetsi nahi duen…
