[Bideoa] Kutxa Birak jaso ditu errenteriarren ametsak
Iparra-Hegoa elkarteak antolatuta eta Lau Haizetara topaguneak bideratuta atzo izan zen udalerrian eta ekitaldi xume bezain ederra antolatu zuten haren bueltan.
Kutxa Birari harrera egin zioten atzo arratsaldean Errenteria-Oreretan. Kutxa Birak Errenteria-Orereta ere bisitatu du. Iparra-Hegoa elkarteak antolatuta eta Lau Haizetara topaguneak bideratuta atzo izan zen udalerrian eta ekitaldi xume bezain ederra antolatu zuten haren bueltan. Aurreskua, mezuaren irakurketa, Ilargi Arrizabalaga abeslari lezoar gaztearen emanaldia, eta errenteriarren ametsen irakurketa ere izan zen ekitaldi horretan. Publiko gisa, iniziatiba babestu duten Errenteria-Oreretako eragile eta elkarteen ordezkariak.
COVID-19aren pandemia testuinguruan euskal kultura eta euskal hiztunen komunitatea ahalduntzeko hainbat egitasmo bertan behera gelditu dira: Herri Urrats, Nafarroa Oinez, Nafarroaren Eguna, Korrika… Hutsune horiek estali nahi ditu Kutxa Bira iniziatibak. Halaber, ilusioa piztea, hizkuntzarekiko lotura bultzatzea, eta harremanak sendotzea ere bilatzen du.
Ilargi Arrizabalaga abeslari lezoar gaztea.
Argentinako Carmen de Patagones hirian ekin dio ibilbideari pasa den hilaren 20an kutxa batek. Bide horretan ametsez betetzen doa kutxa Euskal Herrian zein diasporan igaroko dituen 70 bat herrietan, maiatzaren 30era arte; egun horretan Seguran amaituko du bidea.
Pasaiatik helduko zen atzo Errenteria-Oreretara.
