'Oiartzun suspertuz' aurkeztu dute, enpresari eta autonomoak laguntzeko
COVID19ak sortu duen egoeran laguntzeko bulegoa irekiko dute. Arreta pertsonalizatua eskainiko diete enpresa txiki eta ertain zein autonomoei, Oarsoaldearen bidez.
Eneritz Arbelaitz, Jexux Leonet, Olaia Lasa eta Agustin Lekuona udal gobernu taldeko kideak, egitasmoaren aurkezpenean. Enpresa eta autonomoei suspertzen laguntzeko Oiartzun suspertuz ekintza plana martxan jarri du udalak. Oarsoaldea Garapen Agentziaren bitartez, herriko enpresa txiki eta ertainak zein autonomoak lagunduko dituzte.
COVID-19ak sektore ekonomiko horietan eragindako krisitik ateratzen laguntzea da Oiartzun suspertuz-en helburua.
Egitasmoak enpresa eta autonomoei eskainiko diena honakoa izango da: norberaren egoeraren diagnostikoa egitea; hobetzeko aukerak proposatzea; laguntza ekonomikoei buruzko informazioa ematea eta, bakoitzaren ezaugarri eta beharren aholkularitza espezifikoa eskaintzea.
Zerbitzua erabat pertsonalizatua izango da, eta kanpoko adituen laguntza ere bideratuko dutela adierazi du Oiartzungo Udalak. Arlo ekonomiko hauetan aritzen direnek eska dezakete laguntza: ostalaritza eta turismoa; merkataritza; garraioa eta logistika; metalurgia; kautxua eta plastikoa; eraikuntza; garraio-materiala; aisia eta kultura; hezkuntza; teknologia; soziosanitarioa eta elikadura.
Helburua zehatzago azaldu dute: «Oarsoaldea suspertuz ekimenaren barruan kokatzen da Oiartzun suspertuz. Herriko eta eskualdeko sare ekonomikoa indartzeko eta suspertzeko jarri da martxan ekintza plana, lanpostuak mantendu eta sortu asmoz». Laguntza tekniko horrez gain, beste hainbat zerbitzu eskaintzen ari zaizkie enpresei udala eta Oarsoaldea: COVID-19 laguntza zerbitzua, formazio webinarrak…
Bulegoa irekiko dute Mamuten, Oarsoaldearen egoitzan. Teknikariarekin egoteko aldez aurretik hartu beharko da ordua. Horretarako, 943 49 41 29 telefono zenbakira deitu beharko da; bestela haien posta elektroniko helbidera ere idatz daitekeela jakinarazi dute.
