Udaleku irekietan begirale izateko izena eman ahalko da astelehenetik
Uztaileko udalekuetan lan egiteko izen emate kanpaina datorren aste hasieran -hilak 26- ireki eta maiatzaren 5a bitarte izango da zabalik.
Pasaiako Udaleko Haur, Nerabe eta Gazteen Sustapen Sailak jakinarazi du uztailerako antolatu dituen Udaleku Irekiak jardueran begirale izateko izen emate epea irekiko dutela datorren astelehenean -hilak 26-, maiatzaren 5era arte.
Hautaketa prozesuan parte hartzeko baldintzak bi dira: 18 urte beteta izatea eta euskara jakitea. Hautagaiek proba bat egin beharko dute eta hautaketa-sistemaren irizpideen araberako merituak ere baloratuko zaizkie.
Hautatuek nahitaezko prestakuntza ikastaro batean hartu beharko dute parte, udalekuetarako beharrezkoak izango dituzten programazio ereduez, metodo pedagogikoez, eta abarrez, gutxieneko heziketa izan dezaten. Ikastaroa presentziala izango da eta Pasaiako ikastetxe batean egingo dute, ekainaren 11 eta 12an.
Izena eman nahiz informazio gehiago eskura daiteke HAZ bulegoetan presentzialki, edota telefonoz (943 34 40 34); baita udalaren web orrian edota mezu elektroniko bat idatziz ere.
