Ategorrietako sarraskian eraildakoak gogoratuko dituzte, ahanzturan gera ez dadin
Hilaren 27an 90 urte beteko dira Trintxerpetik Donostiara zihoan manifestazioan zazpi arrantzale erail zituztela. Zenbait ekitaldi antolatu dituzte herritarrek, «gertakarien berri izateko eta gure auzo eta herrien langile izaerari eta egungo egoerari buruz hausnartzeko».
Ategorrietan hil zituzten Trintxerpetik irten ziren manifestariak, 1931. urtean. Hilaren 27an (osteguna da) 90 urte beteko ditu Ategorrietako sarraskiak. 1931n Trintxerpetik Donostiara zihoan manifestazioan zazpi arrantzale erail zituen Guardia Zibilak, baita ere dozenaka lagun zauritu. Bada, egun hura gogoratzeko eta eraildakoak omentzeko, herritar talde batek «ekimen xume bat» egiteko apustua egin du, «Ategorrietako inguruko bizilagunok gertakarien berri izateko eta gure auzo eta herrien langile izaerari eta egungo egoerari buruz hausnartzeko» asmoz haien hitzetan.
«Pozez ikusi dugu hainbat eragile politikok eta antolakundek ere aurten ekitaldiak antolatu dituztela. Horregatik, saiatu gara gure egitaraua prestatzean beste ekimenik ez zapaltzen», esan dute herritar taldekoek.
Gertakari hura gogoratzeko ekintza ugari antolatu dituzte. Lehena hilaren 25ean (asteartea da) egingo dute; Bidebietako Kontadores zentroan Miguel Usabiagaren Donostia rebelde liburua aurkeztuko dute. Argitalpen honetan hainbat protesta eta gertakari sozial jaso zituen Usabiagak, tartean, Ategorrietako sarraskiaren kontakizuna. Aforoa mugatua denez, aldez aurretik izena eman beharko da.
Bigarren ekitaldia hilaren 29rako (larunbata da) antolatu dute, egun osoko egitaraua prestatu dute. 11:00etan Intxaurrondoko Letaman gaztetxean Josetxo Otegi historialariak Ategorreietako gertakarien gaineko hitzaldia eskainiko du. 13:15an aldiz, Ategorrietako erlojuan sarraski hartako biktimei omenaldia egingo diete, poesia, dantza eta musikak lagunduta. 14:00etan Uliako mintegietako parkera joango dira bazkaltzera (norberak etxetik ekarritakoarekin). Ondoren, 16:000etan, eztabaida irekia egingo dute, «memoria historikoa eta gure auzoen ezaugarriak hizpide hartuta». Eta eguna biribiltzeko, 18:00etan zuzeneko musika saioa eskaniko du Chico Sanchez Ferlosioren doinuak eskaintzen dituen De Chicho bikote akustikoak.
Euria eginez gero, antolatzaileek aurretatu dute parkeko ekitaldiak bertan dauden negutegi handietara mugituko dituztela.
Amaitzeko, herritar taldeak laguntza eskatu du, izan ere, gertakari haiekin lotura izan dezakeen pertsonen bila dabiltza: senideak, testigantzaren bat ezagutu duten herritarrak… «Historiako gertakari honen ikerketan sakondu nahi dugu, eta informazio bila gabiltza». Inork zerbait jakingo balu, helbide honetara mezu bat bidali dezala.
Irakurri hemen HITZAk atzo sarraskiaren gainean argitaratutako erreportajea.
