Jantziaren Zentroa bueltan da, «teknologia berriak eta tradizioa uztartuta»
Hamabost eguneko etenaldiaren ostean, gaurtik zabalik da berriro zentroa. Berritasun bezala, lau jantzi bira osoan ikusteko aukera eskainiko dute, teknologia berriak baliatuz.
Hamabost egunez itxita egon ostean, berriro zabaldu ditu ateak Errenteria-Oreretako Jantziaren Zentroak, oraingo honetan, «teknologia berriak eta tradizioa uztartuta». Izan ere, teknologia berriak baliatzeko apustua egin dute, ohiko erakusketei bira bat emateko asmoz.
Erakusketa honetan, modaren historian jantziek izan duten bilakaera modu kronologikoan ikusteko aukera izango dute herritarrek, lehen eta bigarren solairuetan. Guztira, 35 jantzi jaso dituzte, ia guztiak emakumezkoenak, XVIII. mendean hasi eta 1970ko hamarkadara bitartekoak. Bigarren solairuan aldiz, emakumezkoen barruko arropei txoko berezia eman diote. Bost manikitan kortseak, armazoiak, pololoak, mediak… 1895etik 1920era bitarteko lentzeria ikus daiteke bertan.
Eta berritasun bezala, lau jantzi bira osoan ikusteko aukera eskainiko dute urte osoan zehar, ‘Sisu 360 Photo’ enpresaren bitartez. Jantzi bakoitza oinarri birakari baten gainean jarri dute, eta bereizmen handiko 36 argazki atera dizkiote, hamar graduko bana. Horiek guztiak jarraian jarrita, jantzia bira osoan ikus daiteke. Horiek eskuragarri izango diren bi tabletetan ikusteko aukera izango da.
Museoen egunarekin bat
Hurrengo igandeko (hilak 23) Museoen Nazioarteko Egunarekin bat egin nahi izan du Jantziaren Zentroak. Bisita komentatua eskainiko diete herritarrei igande horretan, eta egun sarrerako aretoan ikusgai dagoen Iraultza Dantza Taldearen jantzien inguruko azalpenak emango dituzte, 12:00etan eta 13:00etan. Erakusketa honek dantza taldearen 50 urteko ibilbidea jasotzen du.
Aforoa murriztua izango dela aurreratu dute, eta horregatik aldez aurretik izena eman beharko dute interesdunek, helbide honetara idatziz edo 943 494 521 telefono zenbakira deituz.