Igandean egingo diete 2020an jaiotako oiartzuarrei atsolorra
72 haur jaio ziren iaz Oiartzunen, eta horietatik 35ek hartuko dute parte ekitaldian. Arizmendienean izango da, eguraldiak errespetatuz gero.
Iazko ekitaldian estreinatu zuten atsolorra egiteko toki berria: Arizmendieneko lorategia.
Datorren igandean —hilak 23— iaz Oiartzunen jaio ziren haurrei ongietorri ekitaldia egingo diete, era kolektiboan. Udalak eta familiek antolatuta, atsolorra egingo dute Arizmendieneko lorategian. Eguraldi txarra eginez gero, Haurtzaro Ikastolako jantokian izango da.
Haurren senideek eta udalak elkarlanean ekitaldi xumea antolatu dute, baina edukiz betea. Txalapartaren deia egongo da, eta gurasoek bertsotan, kantari eta musika jotzen arituko dira. Haurrei zapiak jarriko dizkiete, ongietorri seinale moduan.
Iaz herrian 72 haur jaio ziren, eta horietatik 35ek hartuko dute parte igande goizeko ekitaldian (10:30ean hasiko da). Guraso eta gainontzeko senideak ez dira faltako.
Atsolorra berriro berreskuratu zen 2015ean, aurten zazpi urte bete(ko) dituzten haurrekin. Ordutik, urtez urte egonkortzen joan den ekitaldia izan da.
