Basoak hizpide izan dituzte ikasleek eta udaleko ordezkariek
Eskola Agenda 2030 barruko saioa izan da, ikasturte bukaerakoa. Herriko basoen diagnostikoa egin eta konpromisoak hartzeko eskatu diote udalari.
![eskola agenda 2030 oiartzun basoak](https://oarsoaldea.hitza.eus/site/files/2021/05/eskola-agenda-2030-oiartzun-basoak.jpg)
Eskola Agenda 2030en barruan, Oiartzungo ikastetxeetako ikasleek bilera egin dute udalarekin. Elizalde Herri Eskolako, Elizalde Institutuko eta Haurtzaro Ikastolako ikasleek beraien diagnostiko eta proposamenak helarazi dizkiete Eneritz Arbelaitz Ingurumen zinegotziari eta Ander Santesteban saileko teknikariari. Aurten landutako gaia basoa izan da.
Ikasturtean zehar egindakoa errepasatu dute ikasleek, hasteko: sentsibilizazio ekintzak; Basoak ernatzen programaren barruan Gurutzen sagarrondoak aldatu eta herriko basoen egora aztertzeko irteerak egin dituzte (Urkabera, Txarara…), eta abar.
Ondoren, herriko basoen diagnosia egin dute, eta konpromiso zehatzak hartu dituzte. Horrela, ingurunea ezagutzeko ekintzak antolatzen jarraituko dutela hitz eman dute, baita ikastetxeetan elementu naturalak integratzen ere.
Ez dira konpromiso bakarrak: sentsibilizazio kanpainak antolatu nahi dituzte; Elizalde Herri Eskolan 50/50 programa bultzatzea energia aurrezteko edota ikastetxeetan aire libreko ekintza gehiago egin.
Proposamen eta eskaerak
Udalari proposamen eta eskaerak egin dizkiete, herriko basoen zein ingurumenaren gainekoak.
Honakoak izan dira: berdeguneetan eta parkeetan zabor pilaketaren kontrako neurriak hartzea (auzolanak, isunen berri eman…); bertako zuhaitzak landatzen jarraitzea eremu publiko eta pribatuetan; herrigunean berdegune gehiago sortzea; bidegorriko zuhaitzei buruzko informazio-seinaleak berritu eta parkeetan ere jartzea; familientzako baratza komunitarioak sortzea eta Haurtzaro Ikastolako konpost makina berritzea.
Arbelaitzek erantzun die ikastetxeetako ikasleei, “hartutako konpromisogatik” eskerrak emanez. Egindako lana aitortu die, gainera. “Ingurunean hobekuntzak egiteko norbanakook, ikastetxeek eta udalok hartu behar ditugu konpromisoak, pauso txikiek eragin handia izaten baitute”, esan du Arbelaitzek. Horrez gain, konpromiso eta eskaerek udalarekin ildoarekin bat egiten dutela zehaztu du.
2021/2022 ikasturte hasieran elkartuko dira berriz Eskola Agenda 2030eko ikasle eta udal ordezkariak eta orduan, egindako eskaerak banan-banan erantzungo dizkie udalak, aztertu ondoren.
Datorren ikasturtean zein gai landuko duten ere aurreratu dute gaurko saioan: larreak eta zelaiak izango dituzte aztergai.