Iratzerri taldea sortu dute, Lezo berdea helburu
Taldea larunbatean aurkeztuko dute Gezala Auditoriumean egingo duten ekitaldian. Goienerreko kideen hitzaldia ere programatu dute.
Iratzerri taldea sortu dute Lezon, herri eta iratzarri hitzak bateratuz sortu dute izena. Herri berdea, ekologikoa eta iraunkorra sortzea dute helburu, “larrialdi klimatikoari eta energia krisiari aurre egiteko guztiok dugun ardura ernarazi nahi dugu gure herrian. Herri kontzientzia sortu eta herritarrek egun dagoen txirotasun energetikoari aurre egiteko pausoak ematea”, zehaztu dute taldekideek. Taldearen aurkezpen ekitaldia larunbatean egingo dute, 11:00etan hasita, Gezala Auditoriumean. Goiener taldekoen hitzaldia ere izango da bertan.
Larrialdi klimatikoari eta energia krisia arazo global eta transbertsala dela diote taldekideek, eta kezka horrek elkartu dituela hainbat profil teknikoko lezoarrak, hala nola ingeniariak, irakasleak, teknikoak edo kudeatzaileak. “Etorkizunari begira herritarron artean erabakiak hartu nahi dira, eta sortutako energia efiziente baten aldeko apustua egin nahi da, Lezo berde bat sortuz”, nabarmendu dute.
Zeregin horietarako hainbat bide erabiliko dituztela jakinarazi du Iratzerrik. Horien artean daude hitzaldiak, txirotasun energetikoaren leihatila sortzea, edo bonu sozialen tramitazioa erraztea.
Aurkezpenean, Goiener taldearen berri eta aholkuak
Larunbatean, taldea aurkezteaz gainera, mamian sartuko dira. Horregatik, Goiener taldeko Gurutz San Miguelek ekainean indarrean sartuko den elektrizitate tarifazio berriaren gaineko xehetasunak emango ditu. Hiru ordu eremutan banatuko da argindar fakturen kuantifikazioa Sistema berri honek eragin dezakeen txirotasun energetikoari aurre egiteko aholkuak emango ditu. Galde-erantzunetarako tartea ere izango da.
Gezalako aurkezpen eta hitzaldian egiteko aurrez tokiaren erreserba egin behar da. Sakatu hemen izena emateko.
