Elkarteek SOS deia egin dute: "Noiz arte jarraituko dugu itxita?"
Oiartzungo bederatzi elkartek agerraldia egin dute gaur, salatzeko itxita jarraitzen dutela. COVID-19ari aurre egiteko neurriak bermatu dituzte.
Oiartzungo bederatzi elkartetako ordezkariek argazkia atera dute, Ibargainen. Oiartzungo bederatzi elkartek —zerrenda, behean— agerraldia egin dute gaur arratsaldean, beraien egoera salatzeko. Izan ere, itxita jarraitzen dute. “Noiz arte?”, galdetu dute. Egoerak behartuta, elkarlanean aritu direla jakinarazi dute, eta etorkizunean koordinazioa mantentzeko asmoa dutela.
Gogorarazi dutenez, XIX. mendean sortu ziren elkarte edo txoko gastronomikoak. “Bertako ordutegiak langileriari ematen zien askatasuna zela eta, nahiz bertan kontsumitu gabe edo merkeago egiteko eskaintzen zuten aukeragatik martxan jarri zirela”, esan dute. Hori iragana dela esan dute, eta etorkizunari begiratzeko momentua dela.
Euskal Herrian ehunka elkarte daudela nabarmendu dute, eta gehienen ardatza gastronomikoa dela. Hala ere, herrietako kultur bizitzako eragile aktibo direla gogorarazi dute, eta beste alorrak zenbatu dituzte: herri kultura, arlo soziala, kirola, euskara, natura, berdintasuna, feminismoa….
“Kontrola”, errazago
Gogorarazi dute elkarteak eta txokoak bazkideen jabetzakoak direla, eta beraiei dagokiela kudeaketaren ardura. “Kontrolpean daudela esan genezake, eta COVID-19ari aurre egiteko hartu behar diren neurri guztiak hartzen ditugu”, gaineratu dute.
“Horren adibide baino ez da”, jarraitu dute, “irekita egon diren garaian, gure elkarteetan kutsatutakorik ez dela egon. Orduan, arduraz jokatzen badugu, zergatik ez digute irekitzen uzten?”.
Atzera begirada eman diote, eta adierazi dute Osasun Sailak arautegia finkatzeko garaian, elkarteak ostalaritzaren multzoan sartu dituztela. Tabernak eta jatetxeak irekita daude; elkarteak, ez. “Ondorioz, egun, geureak hil zorian itxita jarraitzen dute etorkizunari begira inongo itxaropenik gabe. Galdera errepikatzen da, zergatik gure elkarteek zigor bikoitza jasan behar dute?”.
Tratu berberaren aldarria
Zergak ordaintzen jarraitzen dutela nabarmendu dute, baina jasotzen duten tratua ez dela berbera. Gainera, herriak berak kaltea jasotzen duela seinalatu dute, kultur ekitaldirik ez dagoelako.
“Diskriminatuak, abandonatuak eta ahaztuak sentitzen gara. Guk ere garbitasunerako langileak ditugu eta alokairuak, kredituak, hipotekak eta gastu orokorrak ditugu ordaintzeko”.
Itxita egotearen arrazoia ulertzen ez dutela jakinarazi dute, ostalaritza irekita dagoenean. Gainera, inolako laguntzarik jaso ez dutela argi utzi dute. “Gehienak, egoera hau dela eta, hilzorian gaude. Herriaren parte gara, eta aurrera egin nahi dugu etorkizunari ateak irekiz”.
Elkarteak “irekita, bizirik eta aktibo” ikusi nahi dituzte. Horrela, Gipuzkoako ehun bat elkartek egindako adierazpenarekin bat egiten dutela jakinarazi dute.
“Gu ere elkarte gara eta horrela izaten jarraitu nahi dugu. Gora elkarte eta txoko guztiak”.
Adierazpena sinatu duten elkarteak
- Aldeguna (Arragua).
- Altzibarko Bilera (Altzibar).
- Artaso (Karrika).
- Auzokalte (Ergoien).
- Bazkun Zahar (Altzibar).
- Bizardia (Gurutze).
- Girizia (Elizalde).
- Ibargain (Elizalde).
- Iturriberri (Iturriotz).
